Buyuk Britaniya antidoping agentligi (UKAD) o‘zining rasmiy saytida marhum meksikalik bokschi Moizes Kalleros antidoping qoidalarini buzgani uchun to‘rt yilga diskvalifikatsiya qilinganini ma’lum qildi.
UKAD sportchining qonida kokain topilganini qayd etdi. Tahlil namunasining o‘zi o‘tgan yilning aprel oyida Kallerosning britaniyalik bokschi Galal Yafayga qarshi jangidan so‘ng olingan. Antidoping agentligi keyinchalik meksikalik sportchi 2024-yilning mart oyida 34 yoshida vafot etganini aniqladi. Tashkilot uzr so‘radi va Kallerosning sportdan chetlatilganligi haqidagi xabarni o‘chirib tashladi.
“UKAD meksikalik bokschi Moizes Kallerosning o‘limi haqidagi ma’lumotni Buyuk Britaniyaning antidoping qoidalari bo‘yicha unga nisbatan qo‘zg‘atilgan ish natijalari tafsilotlari e’lon qilinganidan ko‘p o‘tmay oldi”, — deyiladi xabarda.
OK Diario xabariga ko‘ra, Kalleros 34 yoshida Meksikaning Xuares shahridagi uyida yurak xurujidan vafot etgan. Sportchi o‘z uyida o‘lik holda topilgan.
Kalleros 49 ta jang o‘tkazgan, ularning 37 tasida g‘alaba qozongan va 11 tasida mag‘lubiyatga uchragan, yana bir jang durang bilan yakunlangan.
Kallerosning birinchi professional jangi 2008-yil oktyabr oyida bo‘lib o‘tgan. Meksikalik bokschi o‘ta yengil vazn toifasida WBO vaqtinchalik chempionlik unvoni uchun ikki marta jang qilgan, ammo ikkalasida ham mag‘lub bo‘lgan.
Izoh (0)