Rossiya Federal xavfsizlik xizmati Crocus City Hall’ga hujum qilishda gumon qilingan Tojikiston fuqarolarining so‘roq qilinishi tasvirlangan lavhalarni namoyish qildi. Bu haqda “RBK” xabar berdi.
Ayblanuvchilar Sayfullo ismli shaxsning ko‘rsatmalariga amal qilganliklari va u Ukraina chegarasini piyoda kesib o‘tishni ta’kidlaganini aytdi. Birinchi bo‘lib Dalerjon Mirzoyev so‘roq qilingan. U teraktdan keyin qanday rejalari bo‘lgani haqidagi savolga “Kiyev tomon” deb javob bergan.
“Sayfullo bizga Ukrainaga, Kiyevga borishni, u yerda bir million rubl berishlarini aytdi”, — deydi Saidakrami Rachabalizoda.
“Tegishli miqdor to‘rt kishining har biriga va’da qilingan”, — deydi Muhammadsobir Fayzov. U Sayfullo bergan va’dasiga asoslanib, Ukraina chegarasidan o‘tishda ularga odamlar yordam berishi kerak bo‘lganini bildirdi.
Rossiya maxsus xizmatlariga ko‘ra, chegaradan o‘tish bo‘yicha ikkita koridor tayyorlangan.
“Ukraina tomonida Sumi viloyatining Chuykovka va Sopich qishloqlari yaqinida minalardan tozalash ishlari olib borilgan”, — deb xabar berdi “Perviy kanal”.
Hibsga olinganlarning so‘zlariga ko‘ra, ular chegaraga 4 kilometr qolganda mashinani yoqib, Sayfulloning ko‘rsatmasi bo‘yicha piyoda yurishlari kerak edi.
Crocus’dagi terakt
Moskva viloyati Crocus City Hall’dagi terakt 22-mart kuni kechqurun sodir bo‘ldi. Bir necha qurollangan kishi konsert zali binosiga bostirib kirib, olomonni otib tashlagan, keyin esa binoni yoqib yuborgan. Terakt oqibatida 143 kishi halok bo‘lgan, yuzlab odamlar jarohatlangan. Hujumni sodir etishda Tojikistonning to‘rt nafar fuqarosi ayblangan, sud ular aybiga iqror bo‘lganini ma’lum qilgan.
Mazkur holatdan keyin Rossiyada migrantlarga nisbatan munosabat o‘zgargan. Tojikiston prezidenti hujumni “sharmandali va dahshatli voqea” deb atagan hamda ota-onalarni farzandlari tarbiyasiga jiddiyroq e’tibor qaratishga chaqirgan.
O‘z navbatida, Rossiya tergovchilari terakt ishtirokchilarining oilasini so‘roq qilish uchun Tojikistonga borgan. Shundan keyin Vahdat shahrida yashovchi to‘qqiz nafar tojikistonlik Crocus’dagi terakt ijrochilari bilan aloqadorlikda ayblanib, qo‘lga olingan. Hibsga olinganlar ISHID bilan aloqada bo‘lganlikda ham gumon qilinmoqda.
Dog‘istonda ham aksilterror operatsiya o‘tkazilib, to‘rt nafar Tojikiston fuqarosi ushlangan. Ular teraktning asosiy ishtirokchilarini qurol va pul bilan ta’minlagani aytilmoqda. Rossiya Tashqi ishlar vazirligi Ukraina hukumatini rasman Crocus City Hall’dagi teraktda ayblagan. Ukraina rasman mazkur ayblovlarni rad etgan. O‘z navbatida, ISHIDning Afg‘onistondagi bo‘limi “Viloyati Xuroson” ushbu hujum uchun javobgarlikni o‘z zimmasiga olishini bir necha bor ta’kidlagan.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)