Amerika Qo‘shma Shtatlari Xitoy dunyo tartibini o‘zgartirishni xohlaydigan va unga qodir bo‘lgan yagona davlat ekanligini ta‘kidladi. Bu haqda AQSH davlat kotibining birinchi o‘rinbosari Kurt Kempbell ma’lum qildi.
“AQSH prezidenti Jo Bayden maʼmuriyatining Xitoy jahon tartibini o‘zgartirish niyatida bo‘lgan va buning uchun iqtisodiy, diplomatik, harbiy va texnologik kuchga ega bo‘lgan yagona davlat ekanligi haqidagi bahosi ko‘pchilik tomonidan qo‘llab-quvvatlanadi”, — dedi u Milliy xavfsizlik kengashidagi chiqishi davomida.
Kempbell avvalroq Qo‘shma Shtatlar Xitoyni jahon sahnasida asosiy o‘yinchi sifatida tan olishi va Xitoyga nisbatan konstruktiv diplomatiya olib borishi kerakligini aytgan edi.
NATO davlatlari esa Rossiyaning Ukrainadagi harbiy amaliyotini qo‘llab-quvvatlagani uchun Xitoyga qarshi iqtisodiy sanksiyalar qo‘llashi mumkinligi xabar qilingan.
Xususan, BBCga bergan intervyusida NATO bosh kotibi Yens Stoltenberg alyans Xitoyga qarshi ehtimoliy sanksiyalar muhokama qilinayotganini aytgan. Uning so‘zlariga ko‘ra, Xitoy “Ukrainaga qarshi ishlatiladigan raketa va qurollarni yaratishda Rossiya uchun zarur bo‘ladigan ko‘plab texnologiyalarga ega”.
“Ma’lum bir bosqichda, agar Xitoy o‘z xatti-harakatlarini o‘zgartirmasa, ba’zi iqtisodiy jazolar haqida o‘ylashimiz kerak”, — dedi Stoltenberg.
Izoh (0)