Qozog‘istonning Olmaota shahrida samokat bilan qoida buzadiganlarni ushlashni osonlashtirish uchun politsiya xodimlarini ham shunday transportga o‘tkazish rejalashtirilmoqda. Yangi usul hozircha faqat test rejimida va bir hududda joriy qilingan. Ammo tez orada politsiya samokatlari shaharning barcha bog‘ va maydonlarida patrullik qiladi, deb yozmoqda Tengrinews.
“Ba’zida samokat haydovchilari piyodalar yo‘lakchasi bo‘ylab ta’qibdan qochishga urinadi. Albatta, politsiya mashinasi piyodalar yo‘lagiga sakrab chiqolmaydi. Ba’zi hollarda, agar infratuzilma imkon bersa, vaziyat imkon bersa, politsiya piyodani quvib yetadi. Lekin bilasizmi, biz hozir aynan shu narsa haqida o‘ylayapmiz. Park hududlarida piyoda patrul xizmati xodimlari o‘z vazifalarini bajarishi uchun samokatlar bilan ta’minlanishi mumkin”, — dedi Olmaota politsiyasining rasmiy vakili Saltanat Azirbek.
Olmaotada yil boshidan beri samokat haydovchilari tomonidan sodir etilgan yetti mingga yaqin qoidabuzarlik qayd etilgan. Ilgari ular boshqa yo‘l harakati hodisasi qatnashchilari kabi jazolangan bo‘lsa, endi oddiy haydovchi sifatida jazolanmoqda. 30-avgustdan beri 78 nafar samokat ishqibozi jarimaga tortildi.
Sakkiz oy davomida shaharda samokatlar ishtirokida 18 ta baxtsiz hodisa qayd etilgan. Bir jabrlanuvchi halok bo‘ldi, 17 kishi yaralandi. Mopedchilar bilan vaziyat ancha yomon: 223 baxtsiz hodisa yuz bergan, ikki kishi halok bo‘lgan, 240 kishi jarohatlangan.
Izoh (0)