Porye Habibni Maxachevdan kuchliroq jangchi ekanini ta’kidladi

Amerikalik UFC jangchisi Dastin Porye Habib Nurmagomedov va Islom Maxachev o‘rtasidagi o‘xshashlik va farqlar haqida o‘z fikrini bildirdi.

UFC-302 musobaqasida Porye beshinchi raundda Maxachevga mag‘lub bo‘lgan edi.

— Habib va ​​Maxachevning jang uslublarini taqqoslay olasizmi?

— Parterga tortish usuli farqlanadi, lekin raqibiga bosim qilish jihatidan ular o‘xshash. Maxachev klinchda ko‘proq ishlaydi va tos suyagining yuqori qismini ushlab turadi. Habib oyoqlariga borgandi, ya’ni parterga kirishda tananing pastroq qismiga hujumga o‘tadi.

Nazarimda, Habib jismonan kuchliroq. Usulga kirish paytida Islom juda kuchli bosim o‘tkazishini ham alohida ta’kidlash joiz. Barcha jangchilar kuchli, lekin Islom bo‘g‘ish holatida ushlab turganida uning charchagani umuman sezilmadi. O‘ylashimcha, u oktagonda yana kamida besh daqiqa o‘tkazishi mumkin edi”, — dedi Porye MMA Hour nashriga bergan intervyusida.