Украина кучлари 7 июнь куни Луганск ва Херсон вилоятларидаги Россия позицияларига ҳужум уюштириши оқибатида 26 киши ҳалок бўлган. Бу ҳақда The Moscow Timeс нашри хабар берди.
Ҳужумлар оқибатида асосан рус ҳарбийлари ҳалок бўлган. Ўнлаб ярадорлар маҳаллий касалхоналарга олиб кетилган.
Херсон вилоятида Россия ҳукумати томонидан тайинланган маъмурият Украина ҳужумда HIMARS ракеталаридан фойдаланганини маълум қилган. Ракеталар ҳарбий иншоотлар билан бирга фуқаролик биноларига ҳам зарар етказган.
“Жанубий Херсон вилоятидаги Садове қишлоғида кўп сонли ташриф буюрувчилар ва ходимлар бўлган дўкон вайрон бўлди”, — дея маълумот берган Херсондаги Россия ҳокимияти идораси раҳбари Владимир Салдо.
Украина ҳужуми Луганск вилоятида жума куни тонгда кузатилган. Вилоят марказидаги стратегик нуқталарга ракеталар учирилган. Россия ҳарбий маъмурияти ҳужум оқибатида 4 киши ҳалок бўлгани ва 40 дан ортиқ одам яраланганини эълон қилган.
Россия вакиллари жума кунги ҳужумда ҳалок бўлганларнинг тўлиқ рўйхатини эълон қилмаган. Вилоятлар раҳбариятининг асосан тинч аҳоли ҳалок бўлгани ҳақидаги баёноти учун эса ҳозирча етарли манба мавжуд эмас.
Москва ,шунингдек, ҳужумга учраган ҳарбий иншоотлари ҳақида ҳам маълум қилмаган. Ҳужум оқибатида етказилган зарар кўлами аниқланаётгани билдирилган.
Изоҳ (0)