Daniya poytaxti Kopengagenda 7-iyun kuni mamlakat bosh vaziri Mette Frederiksenga hujum uyushtirilgan. Bu haqda Daniya hukumati manbalariga tayanib, CNN nashri xabar berdi.
Manbada aytilishicha, Kopengagen markaziy maydonida nomaʼlum erkak bosh vazirga hujum qilishga uringan. Qo‘riqlash xizmati tomonidan hujumchi to‘xtatilgan.
“Juma kuni kechqurun Kopengagendagi Kultorvet jamoat maydonida Bosh vazir Mette Frederiksenni nomaʼlum erkak urib yubordi. Erkak keyinchalik hibsga olingan”, — deyiladi bosh vazir idorasi xabarida.
Rasmiy xabarda Frederiksen “voqeadan nihoyatda hayratda qolgani” aytilgan va boshqa izoh berilmagan. Hujumda bosh vazir jabrlangan yoki yo‘qmi borasida ham maʼlumot eʼlon qilinmagan.
Daniya atrof-muhitni muhofaza qilish vaziri Magnus Hyuniske hujumdan keyin milliy birlikka chaqirib, “siyosiy kelishmovchiliklar, saylov kampaniyalari” dan qatʼi nazar, har bir daniyalik boshqasi uchun g‘amxo‘rlik qilishga masʼul ekanini aytgan.
“Bizning go‘zal, xavfsiz va erkin mamlakatimizda bunday narsa sodir bo‘lmasligi kerak. Bu xunuk va qabul qilib bo‘lmas voqea. Keling, Daniya ancha yaxshi ekanini ko‘rsataylik”, — degan Magnus Hyuniske
Hujum ortidan birinchi bo‘lib Latviya bosh vaziri Evika Silina munosabat yo‘llagan. Hamkasbi ahvolidan tashvishda ekanini maʼlum qilgan.
“Mening hamkasbim va do‘stim, Daniya Bosh vaziri Mette Frederiksenga qilingan dahshatli hujumdan qattiq hayratda qoldim. Barcha yaxshi niyatlarim siz va yaqinlaringiz bilan. Tezroq sog‘ayib ketishingizni tilayman”, — degan Evika Silina.
Yevropa Komissiyasi prezidenti Ursula fon der Leyen hujumni qoralab, uni “Yevropada biz ishonadigan va kurashayotgan hamma narsaga zid keladigan jirkanch harakat” deb atagan. U bosh vazirga kuch va jasorat tilagan.
Maʼlumot o‘rnida, Daniyaning markaziy so‘l Sotsialistik-demokratik partiyasi rahbari Mette Frederiksen 2019-yildan beri bosh vazir lavozimida ishlab kelmoqda. U Yevropa Ittifoqi g‘oyasini keng targ‘ib qilish hamda milliy qadriyatlarni chuqur himoya qilish borasidagi dasturi bilan tanilgan.
Bundan bir oy muqaddam Slovakiya Bosh vaziri Robert Fikoga ham hujum uyushtirilgan edi. Qurollangan erkak Bratislavada bosh vazirga o‘q uzib, jarohat yetkazgan. Hozirda vazir nisbatan barqaror kuzatuv ostida ekani aytilgan. Yevropa rasmiylari Fikoga hujum so‘nggi 20 yilda Yevropa siyosiy yetakchisiga uyushtirilgan birinchi hujum ekanini maʼlum qilgan edi.
Izoh (0)