Vazirlar Mahkamasining tegishli qarori bilan Shohrux G‘ulamov hamda Akram Aliyev investitsiyalar, sanoat va savdo vaziriga o‘rinbosar vazifasini bajaruvchilar etib tayinlandi. Bu haqda bosh vazir matbuot kotibi Behzod Hidoyatov ma’lum qildi.
Shohrux G‘ulamov (1990-yilda tug‘ilgan) tayinlovga qadar mazkur vazirlikning xalqaro hamkorlik departamenti boshlig‘i lavozimida ishlab kelgan. U, shuningdek, MDH Iqtisodiy kengashi huzuridagi Iqtisodiy masalalar bo‘yicha komissiyada O‘zbekistonning vakolatli vakili sifatida ham ishlagan.
Akram Aliyev (1991-yilda tug‘ilgan) esa vazirlik departamenti direktori lavozimida ishlagan.
“Gazeta.uz”ning Vazirlar Mahkamasi matbuot xizmatiga tayanib yozishicha, ular vakant turgan vazir o‘rinbosarlari lavozimlariga tayinlangan.
Eslatib o‘tamiz, 2024-yil yanvarida prezident tizimidagi kamchiliklar va sustkashlik uchun investitsiyalar, sanoat va savdo vaziri o‘rinbosari Badriddin Abidovni lavozimidan ozod qilgandi. O‘sha oyning o‘zida “O‘zmetkombinat” boshqaruvi raisi birinchi o‘rinbosari Dilshod Ahmedov investitsiyalar, sanoat va savdo vaziri o‘rinbosari etib tayinlangandi.
Izoh (0)