Inson huquqlari bo‘yicha xalqaro federatsiya (FIDH) va uning hamkorlari Xalqaro jinoiy sud prokuraturasidan olti nafar rossiyalik amaldor va jurnalistlarni hibsga olishga order berishni so‘radi. Ular insoniyatga qarshi jinoyat sodir etishda ayblanmoqda.
Ro‘yxatga Rossiya Xavfsizlik kengashi raisi o‘rinbosari Dmitriy Medvedev, Prezident administratsiyasi rahbarining birinchi o‘rinbosari Aleksey Gromov, teleboshlovchi Vladimir Solovyov, RT bosh muharriri Margarita Simonyan, “Rossiya segodnya” media guruhi rahbari Dmitriy Kiselyov va boshlovchi Sergey Mardan kiritilgan.
Ularning barchasi Ukrainaning tinch aholisiga nisbatan nafrat kampaniyasida qatnashgan, harbiy jinoyatlar va Rossiyaning boshqa vahshiyliklarini rag‘batlantirgan hamda qo‘llab-quvvatlagan”, — deyiladi xabarda.
Bayonotga ko‘ra, 2014-yildan beri “Rossiya davlat telekanallari, radiolari va ijtimoiy tarmoqlarida Ukrainani yo‘q qilish va ukrainaliklarga qarshi repressiyaga chaqiriqlar muntazam bong urib kelinmoqda”.
Inson huquqlari bo‘yicha xalqaro federatsiya ayblovlarni e’lon qilish uchun 2022-yil 24-fevraldan 2024-yil 24-fevralgacha olti nafar mansabdor shaxs va targ‘ibotchilarning bayonotlari aks etgan ikki mingdan ortiq videokliplarni tahlil qildi. 300 dan ortiq bayonotlar insoniyatga qarshi jinoyatga teng nafrat nutqini tashkil etishi aytilmoqda.
XJS Putinni hibsga olishga order bergandi
2023-yilning mart oyida Xalqaro jinoiy sud Rossiya prezidenti Vladimir Putin va bolalar huquqlari bo‘yicha komissar Mariya Lvova-Belovani hibsga olishga order bergan. Ular Ukrainaning bosib olingan hududlaridan bolalarni Rossiyaga noqonuniy deportatsiya qilganlikda ayblanmoqda.
2024-yil mart oyida Rossiya Qora dengiz floti qo‘mondoni Viktor Sokolov va Rossiya Aerokosmik kuchlarining uzoq masofali aviatsiyasi boshlig‘i Sergey Kobilashni hibsga olishga ham order berilgan.
Sud qarorida order qanday jinoyatlar uchun berilgani ko‘rsatilmagan. 2023-yil boshida Ukraina zavfsizlik xizmati ikki nafar yuqori martabali rossiyalik harbiyni Ukrainadagi tinch aholini obyektlarini o‘qqa tutganlikda ayblagandi. Ular orasida Kobilashning, shuningdek, Rossiya Qora dengiz flotining sobiq qo‘mondoni, admiral Igor Osipov ismi keltirilgandi.
Izoh (0)