Turkiyadan to‘g‘ridan to‘g‘ri xorijiy investitsiyalar hajmi 10 barobar oshdi, deb xabar bermoqda Investitsiyalar, sanoat va savdo vazirligi axborot xizmati.
Maʼlum qilinishicha, investitsiyalar, sanoat va savdo vazirining birinchi o‘rinbosari Nozimjon Xolmurodov Turkiya poytaxtida bo‘lib o‘tgan “O‘zbekiston-Turkiya strategik munosabatlari — kelajakning kompleks istiqbollari” mavzusiga bag‘ishlangan simpoziumda ishtirok etdi.
Turkiya Milliy kutubxonasida bo‘lib o‘tgan yirik tadbirda Turkiya prezidenti administratsiyasi vakillari, ikki davlatning vazirlik va idoralar rahbarlari, yetakchi siyosatshunoslari va ekspertlari O‘zbekiston va Turkiya o‘rtasidagi strategik hamkorlikning ko‘lamini kengaytirish masalalarini muhokama qilish va konseptual yechimlarni ishlab chiqish maqsadida yig‘ildi.
So‘zga chiqqanlar O‘zbekiston va Turkiya o‘rtasidagi ikki tomonlama savdo-iqtisodiy va sarmoyaviy hamkorlik o‘sish dinamikasining yuksak natijalarini qayd etdi. Xususan, so‘nggi besh yilda ikki davlat o‘rtasidagi o‘zaro tovar ayirboshlash hajmi 1,3 barobar, O‘zbekistonda turk kapitali ishtirokidagi korxonalar soni 3 barobarga oshib, 1898 taga, Turkiyadan to‘g‘ridan-to‘g‘ri xorijiy investitsiyalar hajmi 10 barobar oshdi.
O‘tgan yil davomida 260 ta yangi o‘zbek-turk qo‘shma korxonasi tashkil etildi va bu Turkiyani O‘zbekistondagi qo‘shma korxonalar soni bo‘yicha boshqa hamkorlar orasida uchinchi o‘ringa olib chiqdi. Ikki davlat o‘rtasidagi muntazam aviaqatnovlar soni 2,5 barobarga ko‘payib, haftasiga 90 taga yetdi.
Shu bilan birga, O‘zbekistonda investitsiya muhitini yanada yaxshilash bo‘yicha amalga oshirilayotgan samarali chora-tadbirlar, jumladan, yillik iqtisodiy o‘sish 6 foizga oshirilgani, inflyatsiya darajasi 9 foizga pasaygani, JST standartlariga muvofiq “To‘g‘ridan to‘g‘ri investitsiyalar to‘g‘risida”gi qonunning yangi tahriri ishlab chiqilgani, EIZlarda samarali boshqaruv tizimi joriy etilgani, soliqlar stavkalari va soni pasaytirilgani, yirik kompaniyalar aksiyalarini xususiylashtirish va IPOga chiqarish bo‘yicha yangi dastur amalga oshirilayotgani, Toshkent xalqaro Arbitraj markazi o‘z ishini boshlagani va boshqa ko‘rilayotgan choralar qayd etildi.
O‘zbekiston tomoni Turkiya hukumati, sarmoyaviy va sanoat doiralari bilan ko‘p qirrali munosabatlarni yanada mustahkamlashga sodiqligini bildirdi.
Izoh (0)