Kuvayt amiri Mishal al-Ahmad al-Jobir as-Saboh shayx Saboh Xolid as-Sabohni valiahd shahzoda etib tayinlash haqidagi farmonni imzoladi. Bu haqda KUNA davlat axborot agentligi ma’lum qildi.
Saboh Xolid al-Saboh 1953-yilda tug‘ilgan. U Kuvayt universitetida siyosatshunoslik bo‘yicha bakalavr darajasini olgan. 2019-yildan 2022-yilgacha bosh vazir lavozimida ishlagan. Turli yillarda tashqi ishlar vaziri, Kuvaytning BMTdagi doimiy vakili, Saudiya Arabistonida elchi bo‘lgan.
Oldingi barcha amirlar va valiahdlar al-Jobir yoki al-Salim sulolasiga mansub edi. Shayx Saboh esa otasi hech qachon amir bo‘lmagan birinchi valiahd shahzoda bo‘ldi.
Kuvayt konstitutsiyasiga ko‘ra, valiahd shahzoda nomzodi Milliy assambleya tomonidan tasdiqlanishi kerak. Biroq 10-may kuni Kuvayt amiri Milliy majlis (bir palatali parlament) tarqatib yuborilgani va konstitutsiyadagi ayrim qoidalar to‘xtatilganini eʼlon qildi.
Uning so‘zlariga ko‘ra, mamlakat siyosiy sahnasidagi kelishmovchiliklar tufayli rasmiylar konstitutsiyaning ayrim moddalari faoliyatini to‘rt yildan ko‘p bo‘lmagan muddatga to‘xtatib qo‘yishga majbur bo‘lmoqda, bu davrda “demokratik jarayonning barcha jihatlari o‘rganiladi”. Shundan so‘ng parlament vakolatlari vaqtincha amir va vazirlar mahkamasiga o‘tdi.
Mishal al-Ahmad al-Jobir as-Saboh o‘tgan yilning 20 dekabrida milliy assambleya oldida qasamyod qabul qilib, rasman Kuvayt amiri bo‘ldi. Avvalgi amir Navaf al-Ahmad al-Jobir as-Saboh 2020-yil sentyabridan 2023-yilning 16-dekabr vafotiga qadar amir lavozimida ishlagandi.
Izoh (0)