Turkiya harbiylari 15-may kuni Iroq shimolida Kurdiston ishchi partiyasiga aloqador 12 nafar jangarini yo‘q qilgan. Bu haqda Turkiya Milliy mudofaa vazirligi bayonotiga asoslanib, Anadolu nashri xabar berdi.
Manbada aytilishicha, chorshanba kuni Turkiya qurolli kuchlari Gara va Hakurk mintaqalarida havo hujumlarini amalga oshirgan. Turk qurolli kuchlari maxsus operatsiya o‘tkazayotgan hududga kirib kelgan jangarilar nishonga olingan.
Rasmiylar jangarilar 12 nafar bo‘lganini maʼlum qilgan. Ular bevosita Kurdiston ishchi partiyasi aʼzolari bo‘lgani xabar qilingan.
“Mintaqada bitta ham terrorchi qolmaguncha operatsiyalarimizni tinimsiz davom ettiramiz”, — deyilgan Turkiya Milliy mudofaa vazirligi xabarida.
Vazirlik rasmiylari Kurdiston ishchi partiyasi shimoliy Iroq hududidan Turkiyaga qarshi terrorchilik hujumlarini tayyorlash uchun boshpana sifatida foydalanayotganini xabar bergan.
Maʼlumot o‘rnida, Kurdiston ishchi partiyasi 40 yildan ortiq vaqtdan beri Turkiya va Yaqin Sharq hududida terrorchilik hujumlari tashkil etib keladi. Partiya rasman Turkiya, AQSH va Yevropa Ittifoqi tomonidan terrorchi tashkilotlar ro‘yxatiga kiritilgan. Partiya uyushtirgan teraktlar oqibatida umumiy 40 ming nafardan ortiq odam, jumladan, ayollar, bolalar va go‘daklar halok bo‘lgani xabar qilinadi.
Izoh (0)