“G‘aroyib odamlar” muxlisi filmga oid 25 mingdan ortiq buyumlar to‘plami bilan Ginnes rekordlari kitobiga kirdi (video)

Amerikalik IT mutaxassis, “G‘aroyib odamlar” franshizasining ashaddiy muxlisi Erik Jaskolka film bilan bog‘liq 25 mingdan ortiq turli buyumni to‘pladi va Ginnes rekordlari kitobiga kiritildi. Bu haqda “Pravila jizni” nashri xabar bermoqda.

53 yoshli Erik hozirda IT loyihalar menejeri bo‘lib ishlaydi. U 1989-yilda o‘zining noodatiy xobbisini kashf etgan. Komikslar do‘koniga ega o‘qituvchisi maktabda unga superqahramonlar haqida aytib bergach, yosh Erikda ularga qiziqish uyg‘ongan. Avvaliga u turli jurnallar va o‘yinchoqlarni yig‘a boshladi, so‘ng filmga oid boshqa predmetlar: kalendar, shakllar, liboslar, qutilar, o‘quv qurollari, tekstil predmetlarini ham xarid qildi.

Qayd etilishicha, kolleksiyachi “G‘aroyib odamlar” filmiga oid barcha original komikslar va jurnallarni, Rosomaxa va Psaylok haykalchasini sotib olgan. Bugungi kunda u haftasiga kamida 4-5 ta yangi komiks sotib oladi.

Jaskolka to‘plagan buyumlar uyidagi ikkita katta xonani egallaydi, yana yuzlab buyumlar alohida saqlanadi. Uning so‘zlariga ko‘ra, sevimli mashg‘ulotiga sarmoya qilingan pul evaziga yangi uy sotib olish mumkin edi.

Avvalroq fransuz oshpazlari 140 metr uzunlikdagi baget noni pishirib, italiyaliklar o‘rnatgan jahon rekordini yangilagan edi.