“Дарё” репортажи: 40 кун давом этадиган халқаро гуллар фестивалига тайёргарлик кўраётган Наманган (видео)

Наманганда 63-халқаро гуллар фестивалига тайёргарлик якуний босқичга кирди. Бу ҳақда “Дарё” мухбири Азизбек Абдувалиев хабар бермоқда.

Бу йилги байрам тадбирлари Бобур боғи, “Афсоналар водийси” парки ва “Янги Ўзбекистон боғи” амфитеатрида бўлиб ўтиши кўзда тутилган.

Фестиваль 19 майдан бошланади ва қарийб 40 кун давом этади. Тадбирни анъанавий тарзда гуллар билан безатилган автомобиллар паради бошлаб беради.

Фестиваль доирасида модалар ҳафталиги, адабиёт байрами, ҳунармандлар ярмаркаси, ош чемпионати, аския ва ретро-қўшиқлар кечалари, авто ва дрон-шоулар, шотокан-каратэ бўйича Осиё чемпионати, этноспорт мусобақалари ва лаванда сайли ўтказилади.

Халқаро мақомни олган фестивалга кўплаб ўзбек ва дунё эстрадаси юлдузларининг ташрифи ҳамда гала-концертлар кутилмоқда.

Фестиваль 23 июнь куни “Янги Ўзбекистон боғи” амфитеатридаги тақдирлаш маросими билан якунига етади.