Toshkent viloyatida naqd xorijiy valyutalarni olib chiqishga bo‘lgan urinish fosh etildi, deb xabar beradi viloyat bojxona boshqarmasi matbuot xizmati.
Qayd etilishicha, qo‘shni davlatga o‘tish uchun “G‘ishtko‘prik” chegara bojxona postiga piyoda holda kirib kelgan fuqaro bojxona nazoratidan o‘tayotgan vaqtida xatti-harakatlarida shubha paydo bo‘lgani sababli bojxona xodimi belgilangan tartibda shaxsiy ko‘rikdan o‘tkazgan.
Natijada og‘zaki so‘rovda maʼlum qilinmagan va yozma ravishda deklaratsiyalanmagan 670 ming Rossiya rubli miqdoridagi xorij valyutasi borligi aniqlangan.
Hozirda ushbu holat yuzasidan surishtiruv harakatlari olib borilmoqda.
Amaldagi tartiblarga ko‘ra jismoniy shaxslar tomonidan ekvivalenti 100 million so‘mga teng yoki undan oshmaydigan miqdordagi naqd valyuta mablag‘larini O‘zbekistondan tashqariga bojxona nazorati qoidalariga rioya etilgan holda cheklovlarsiz olib chiqishlariga ruxsat etiladi.
Avvalroq “Yallama” postida 830 mln so‘mlik LED chiroqlarning mamlakatga noqonuniy olib kirilishiga chek qo‘yilgani to‘g‘risida xabar berilgandi. Shuningdek, Buxoroda 15,5 mlrd so‘mlik pestitsidlarning mamlakatga noqonuniy olib kirilishiga chek qo‘yilgan edi.
Izoh (0)