Qoraqalpog‘iston Respublikasi, Buxoro va Namangan viloyatlarida valyuta ayirboshlash bilan shug‘ullanib kelgan shaxslar ushlandi. Bu haqda Bosh prokuratura huzuridagi departament xabar berdi.
Qayd etilishicha, departamentning Qoraqalpog‘iston Respublikasi boshqarmasi tomonidan tezkor tadbir o‘tkazilgan. Tadbirda valyuta ayirboshlash bilan shug‘ullanib kelgan R.A.(muqaddam sudlangan) va boshqalar jami 4,7 ming dollarni fuqaro S.D.ga 59,9 million so‘mga sotgan vaqtida ashyoviy dalillar bilan ushlangan.
Shu kabi, departamentning Buxoro shahar bo‘limi tomonidan o‘tkazilgan tezkor tadbirda fuqaro R.S. (muqaddam Jinoyat kodeksining 177-moddasi bilan sudlangan) jami 3 650 dollarni fuqaro K.M.ga 46,2 million so‘mga sotgan vaqtida ushlanib, uning yonidan 64 350 Rossiya rubli, 450 AQSH dollari va 174,4 million so‘m ashyoviy dalil sifatida olingan.
Departamentning Davlatobod tuman bo‘limi tomonidan o‘tkazilgan tezkor tadbirda valyuta ayirboshlash bilan shug‘ullanib kelgan B.K. jami 3,5 ming dollarni fuqaro N.I.ga 44,6 million so‘mga sotishga kelishib, shundan 900 dollarni berib, 44,6 million so‘mni olgan vaqtida ashyoviy dalillar bilan ushlangan.
Departamentning To‘raqo‘rg‘on tuman bo‘limi tomonidan o‘tkazilgan tezkor tadbirda esa valyuta ayirboshlash bilan shug‘ullanib kelgan O.J. jami 3,4 ming dollarni fuqaro X.R.ga 43,1 million so‘mga sotgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Andijon va Qashqadaryo viloyatlarida valyuta qimmatliklarini noqonuniy muomalaga kiritilishiga chek qo‘yilgani to‘g‘risida xabar berilgandi.
Izoh (0)