O‘zbekistonda haftaning ikkinchi yarmida harorat pasayadi

Ushbu haftaning birinchi yarmida O‘zbekiston hududining katta qismida quruq va iliq ob-havo bo‘lishi kutilmoqda, deb xabar berdi “O‘zgidromet”.

Havo harorati kundan kunga ko‘tarila boshlaydi va haftaning o‘rtasiga kelib 33-36 darajaga yetadi, janubda va cho‘l hududlarda 38 darajagacha issiq bo‘ladi.

14-maydan boshlab faqat respublikaning shimoli-g‘arbiy hududlari Kaspiy dengizidan kirib kelgan nam havo ta’siri ostida bo‘ladi.  14—15-may kunlari Qoraqalpog‘iston Respublikasi, Xorazm viloyatida va Navoiy viloyatining shimolida ba’zi joylarda qisqa muddatli yomg‘ir yog‘adi, momaqaldiroq bo‘ladi.

Haftaning ikkinchi yarmida nam havo massalari sharqqa qarab tarqalardi va respublikaning ayrim joylarida momaqaldiroq bilan qisqa muddatli yomg‘ir yog‘adi. Havo harorati 25-30 darajagacha pasayadi.

Respublika bo‘yicha ba’zi joylarda shamol tezligi 15-20 metr/sekundgacha kuchayishi, ayrim joylarda chang-to‘zon bilan kuzatilishi mumkin.