AQSH prezidenti Jo Bayden G‘azo sektorida o‘t ochishni to‘xtatish shartini aytdi. Bu haqda Deutsche Welle xabar berdi.
Bayden agar HAMAS garovda ushlab turilgan isroilliklarni ozod qilsa, G‘azoda o‘t ochishni to‘xtatishga “ertagayoq” erishish mumkinligini aytdi. U tegishli nutqni 11-may kuni Vashingtondagi saylovoldi kampaniyasi tadbirida bildirdi.
Washington Post gazetasining yozishicha, AQSH Isroilga Rafah shahriga keng ko‘lamli hujumdan voz kechishni taklif qilgan. Buning evaziga AQSH yahudiy davlatiga HAMAS yetakchilarini topishda yordamlashishni, G‘azo sektoridagi HAMAS tunnellari sxemalarini berishni va’da qilgan.
AQSH hukumati Isroil armiyasining bir millionga yaqin falastinlik yashaydigan va boshpana sifatida foydalanayotgan Rafah shahriga bostirib kirishiga yo‘l qo‘ymaslikka harakat qilmoqda. Ammo Isroil tashqi bosimlarga qaramay, Rafahdagi harbiy operatsiya davom etishini bildirgan.
Isroil harbiylari Rafahning sharqiy qismida HAMAS nazoratidagi nishonlarga aniq zarbalar berayotganini aytmoqda. HAMAS yetakchisi Ismoil Haniya o‘t ochishni to‘xtatish sulhiga rozilik bildirgan. Biroq Isroil bosh vaziri Binyamin Netanyaxu buni “hiyla” deb baholab, unga qarshilik ko‘rsatgan.
Izoh (0)