Oq uy matbuot kotibi Karin Jan-Pyer Qo‘shma Shtatlar o‘q-dorilarning faqat bir partiyasini yetkazib berishni vaqtinchalik to‘xtatganini ma’lum qildi. Bu haqda EAdaily xabar berdi.
Bu pauza. Biz ma’lum bir ta’minotga nisbatan pauza haqida gapiryapmiz. Bu qurol yetkazib berishni to‘xtatish emas, pauzadir, — dedi u San-Fransiskoga ketayotgan prezident samolyoti bortida bo‘lib o‘tgan brifingda.
Uning taʼkidlashicha, Qo‘shma Shtatlar hozirda Rafahda hech qanday harbiy amaliyotlar qayd etilmagan, lekin shaharga keng ko‘lamli bosqin uyushtirilishidan xavotirda. Matbuot kotibi bu pauza qancha davom etishiga aniqlik kiritmagan. Qo‘shma Shtatlar jo‘natilishi to‘xtatilgan o‘q-dorilarning kelajagi bo‘yicha hali yakuniy qaror qabul qilgani yo‘q.
9-may kuni bo‘lib o‘tgan brifingda Pentagon rasmiysi Patrik Rayder AQSH hukumati o‘tgan hafta Rafahda harbiy amaliyotlar chog‘ida qo‘llanilishi mumkinligi sababli Isroilga 3500 ta aviabomba yetkazib berishni to‘xtatganini ma’lum qilgan edi.
AQSH prezidenti Jo Bayden 8-may kuni CNN telekanaliga bergan intervyusida Rafahda yirik harbiy operatsiya o‘tkazilsa, AQSH Isroilga qurol yetkazib berishni to‘xtatishini aytgan. Shu kuni AQSH Mudofaa vaziri Lloyd Ostin Vashington Rafah atrofidagi vaziyat munosabati bilan Isroilga qisqa muddatli harbiy yordamning ayrim turlarini qayta ko‘rib chiqishini tushuntirgan. Uning bayonotlariga ko‘ra, yuqori quvvatli bombalarni yetkazib berish to‘xtatilgan. Pentagon taʼminot bo‘yicha yakuniy qarorlar qabul qilinmaganini aytgan. Davlat departamentining aniqlik kiritishicha, Isroilga faqat bir partiya o‘q-dorilar yetkazib berish to‘xtatilgan bo‘lsa-da, boshqa harbiy yuklar ham ko‘rib chiqilmoqda.
5-may kuni Axios portali Amerika ma’muriyati 2023-yil 7-oktyabrdan beri birinchi marta Isroilga o‘q-dorilar yetkazib berishni to‘xtatganini ma’lum qilgan. Bu qadam Isroil rasmiylarida jiddiy xavotir uyg‘otgan.
Izoh (0)