Туркия президенти Ражаб Тоййиб Эрдўғон АҚШга ташрифини ва Жо Байден билан режалаштирилган учрашувини томонларнинг бандлиги сабабли бекор қилди. Бу ҳақда Туркия етакчиси Грециянинг Kathimerini газетасига берган интервьюсида маълум қилди.
Туркия Ташқи ишлар вазирлиги аввалроқ таъкидлаганидек, Эрдўғоннинг АҚШга ташрифи 9 майга белгиланганди, бироқ у “жадваллардаги номувофиқлик туфайли ҳар икки томон учун қулай бўлган” кечроқ санага кўчирилди. Эрдўғоннинг сўзларига кўра, ҳозирда тегишли сана муҳокама қилинмоқда.
Бизнинг АҚШга ташрифимиз икки томоннинг график бир-бирига тўғри келмаслиги сабабли қолдирилди, маълумки, АҚШ сайловлар арафасида ва жаноб Байденнинг иш графики янада тиғиз. Бундай ташрифлар ҳар икки томон учун қулай вақтда амалга оширилади, — деди Туркия президенти.
Аввалроқ Туркиянинг Т24 газетаси режалаштирилган ташрифнинг узилишига Туркиянинг Ироқ шимолидаги ҳарбий амалиёти бўйича келишмовчилик ва Вашингтоннинг Анқарага иқтисодий ён босиши ҳақидаги умидларининг бажарилмагани сабаб бўлиши мумкинлигини ёзганди.
Hurriyet газетаси манбаларига таяниб, Туркия қуролли кучлари Эрдўғоннинг Ироққа ташрифидан сўнг мамлакатда тақиқланган Курдистон ишчилар партиясига қарши қуруқликдаги операция ўтказишини маълум қилди. Операция ёз ойларида ўтказилиши мумкин.
Эрдўғон Анқара ёзда Ироқ билан “чегара хавфсизлиги масаласини ҳал қилишни” кутаётганини бир неча бор таъкидлаган. Унинг сўзларига кўра, Туркия томони Сурияда 30-40 километр чуқурликда хавфсизлик коридорини яратишга ҳам интилмоқда.
Изоҳ (0)