“Darband” YPX maskanida Surxondaryo viloyati IIB Jamoat tartibini saqlash boshqarmasi Karantin tadbirlarini taʼminlash bo‘linmasi hamda viloyat veterinariya va chorvachilikni rivojlantirish boshqarmasi xodimlari tomonidan reyd tadbirlari o‘tkazildi.
Qayd etilishicha, 7-may kuni soat 07:10 larda Denov—Toshkent yo‘nalishi bo‘ylab harakatlanib kelayotgan 24 yoshli M.Sh. boshqaruvidagi Cobalt rusumli avtomashina to‘xtatilib, yukxonasi tekshirilganida biror-bir tegishli veterinariya hujjatlarisiz 140 kilogramm yirik shoxli mol go‘shti olib ketayotgani aniqlangan.
Shuningdek, 8-may kuniga o‘tar kechasi soat 02:30 larda shu yo‘nalish bo‘ylab harakatlanib kelayotgan 24 yoshli A.A. boshqaruvidagi Cobalt rusumli avtomashina yukxonasi tekshirilganda, hech qanday veterinariya hujjatlarisiz 475 kilogramm yirik shoxli mol go‘shti olib ketayotgani ma’lum bo‘lgan.
Aynan shu maskanda reyd tadbiri davom ettirilib, soat 02:50 larda Sho‘rchi—Toshkent yo‘nalishi bo‘ylab harakatlanib kelayotgan 27 yoshli N.J. boshqaruvidagi Cobalt rusumli avtomashina yukxonasi tekshirilganda, tegishli veterinariya hujjatlarisiz 400 kilogramm yirik shoxli mol go‘shti olib ketayotgani aniqlangan.
Yuqorida aniqlangan holatlar bo‘yicha go‘sht mahsulotlarining iste’molga yaroqli yoki yaroqsiz ekanini tekshirish maqsadida, viloyat hayvonlar kasalliklari tashxisi va oziq-ovqat mahsulotlari xavfsizligi davlat markazi laboratoriyasiga taqdim etilganida, iste’molga yaroqsiz ekani aniqlanib, go‘sht egalariga nisbatan Ma’muriy javobgarlik to‘g‘risidagi kodeksning tegishli moddasiga asosan ma’muriy bayonnoma rasmiylashtirilgan va go‘sht mahsulotlari belgilangan tartibda yo‘q qilingan.
Bundan oldin Toshkentga uch tonna iste’molga yaroqsiz tovuq go‘shti olib ketayotgan yuk mashinasi to‘xtatib qolingani, Qashqadaryoda noma’lum hayvon go‘shtini olib ketayotgan haydovchi ushlangani, Jizzaxdagi bozorda qariyb 200 kiloga yaqin tovuq go‘shti iste’molga yaroqsiz ekani aniqlangani to‘g‘risida xabar berilgandi.
Izoh (0)