Бразилияда кучли тўфондан сўнг сув босган шаҳардаги бино томида қолиб кетган отни қутқариш учун махсус қутқарув гуруҳи жалб қилинди. Бу ҳақда Al Jazeera нашри Лотин Америкаси манбаларига асосланиб, хабар берди.
Манбада айтилишича, тошқиндан сўнг Карамело лақабли от бино томида жон сақлаб қолган. Тошқинни тасвирга олаётган кузатув дронлари отни пайқаб қолиб, қутқарув бригадаларига сигнал берган.
Бразилияда айни дамда сўнгги 80 йил ичидаги энг кучли сув тошқинлари кузатилаётгани маълум қилинган. Расмийлар фавқулодда табиий ҳолат оқибатида ҳалок бўлганлар сони 100 нафардан ошганини маълум қилишган.
Тошқин туфайли аҳолиси кўчириб кетилган шаҳарчада аниқланган от тасвирлари бутун мамлакат аҳолиси орасида муҳокамага сабаб бўлган. Ижтимоий тармоқларда бу тўғрисидаги хабарлар фаол айланган. Фуқаролар жониворни қутқаришга чақиришган.
Рио Гранде до Сул штати жанубидаги Порту-Алегре метрополитан ҳудуди, Каноас шаҳрида қийин вазиятга тушиб қолган Карамелони қутқариш учун ўт ўчирувчилар бригадаси зудлик билан жалб қилинган. Қутқарувчилар келгунича Карамело бино томидаги сирпанчиқ таянчда қийинчилик билан мувозанат сақлаб туришига тўғри келган.
Оғирлиги 349 кг бўлган отни резина қутқарув қайиғига чиқариб олиш қийинчилик туғдирган. Қутқарувчилар Карамелони қайиққа чиқаришдан олдин уни тинчлантиришга уринишган.
Ижтимоий тармоқларда отнинг қутқарув жараёнини 17 миллион фуқаро кузатиб борган. Жонли эфир изоҳлари “Карамело, Бразилия сени севади!” тарзидаги изоҳлар билан тўлиб тошган.
Етти ёшда деб тахмин қилинган Карамело ҳозирда ветеринария шифохонасида даволанмоқда. Ветеринария шифокори ва муассаса профессори Марианжела Аллгаер ижтимоий тармоқларда у жуда заиф ҳолатда эканини билдирган.
Штат расмийлари маълум қилишича, қутқарувчилар тошқиндан сўнг 10 мингга яқин ҳайвонларни қутқариб қолган. Мингга яқин ҳайвон ҳалок бўлгани маълум қилинган.
Изоҳ (0)