Neymar Braziliyadagi tabiiy ofatdan jabrlanganlarga yordam berdi.
“Al-Hilol” hujumchisi Rio Grande-du-Sul shtatidagi suv toshqinidan jabr ko‘rgan aholiga suv, oziq-ovqat va boshqa mahsulotlar yetkazib berish uchun shaxsiy samolyotini jo‘natgan.
Neymar o‘zining ijtimoiy tarmoqlarida holatga befarq bo‘lmagan kishilarni tabiiy ofat oqibatlarini bartaraf etishda ishtirok etishga chaqirdi.
“Braziliya og‘ir damlarni boshdan kechirmoqda va moliyaviy ahvolingizdan qat’i nazar yordamingiz qadrli. Muhimi, yuragingizda nimani his qilishingiz. Men qilgan ishlarim yoki yordamim haqida hamma narsani ommaga taqdim qilishni yoqtirmayman, chunki buni qilganlar chin yurakdan qilishadi.
Ushbu post odamlarni yanada ko‘proq yordam berishga ilhomlantirish uchun mo'ljallangan. Samolyotim uchuvchilari va yordamda ishtirok etgan barchaga oldindan minnatdorchilik bildiraman. Men shu yerda, uzoqdan turib, hammasi o‘z joyiga qaytishini duo qilaman... Otam qo‘lidan kelgan barcha yordamni ko‘rsatmoqda”, — deb yozadi Neymar.
BBC rasmiylarga tayanib xabar berishicha, suv toshqini tufayli Rio Grande-du-Sulning 150 mingga yaqin aholisi uylarini tark etishga majbur bo‘lgan. Kamida 85 kishi halok bo‘lgan, yana 130 kishi bedarak yo‘qolgan. Vaziyat shu hafta kuchli yomg‘irlar fonida yomonlashishi kutilmoqda.
Izoh (0)