O‘zbekistonda yanvar—aprel oylarida iste’mol narxlari oshishi 2,6 foizni tashkil etdi. Bu haqda Statistika agentligi hisobotida ma’lum qildi. Aprel oyida iste’mol narxlari o‘tgan yilga nisbatan (0,82 foiz) biroz tezlashib, 0,93 foizni tashkil etgan.
Ma’lumotlarga ko‘ra, aprel oyida oziq-ovqatlar 0,4 foizga, nooziq-ovqat mahsulotlari 1 foizga, pullik xizmatlar 1,8 foizga qimmatlashgan. 2023-yilning aprel oyiga nisbatan taqqoslaganda, o‘tgan 1 yilda oziq-ovqatlar narxi 7 foizga, nooziq-ovqatlar narxi 7,7 foizga, xizmatlar narxi 10,8 foizga oshgan.
Aprel oyida narxlarning o‘sishi bo‘yicha mevalar (+3 foiz) yetakchi bo‘ldi. Oy davomida banan 9,9 foizga, mandarin 7,5 foizga qimmatlashgan. Shu bilan birga, sut mahsulotlari 2,7 foizga, sabzavotlar 1,2 foizga arzonlashgan.
Aprel oxirlarida Markaziy bank bazaviy inflyatsiya sezilarli sekinlashib, mart oyida yillik 7,6 foiz va yil boshidan umumiy inflyatsiya darajasidan pastroq shakllanganini ma’lum qilgandi.
Regulyator 2023-yil yakuni bo‘yicha inflyatsiya darajasi 8,5–9,5 foiz atrofida bo‘lishini prognoz qilgan va yil yakunida yillik inflyatsiya 8,77 foiz darajasida qayd etilgandi. 2022-yilda yillik inflyatsiya 12,3 foizni tashkil etgan. 2021-yilda bu ko‘rsatkich 9,98 foiz, 2020-yilda 11,1 foiz, 2019-yilda 15,2 foiz, 2018-yilda 14,3 foiz, 2017-yilda 14,4 foiz bo‘lgan.
Izoh (0)