Франциялик дунёга машҳур актёр Жерар Депардье жинсий зўравонликда айбланиб, Парижда ҳибсга олинган. Бу ҳақда CNN нашри хабар берди.
Манбада айтилишича, актёр ҳозирда Париж полициясининг тергов изоляторига жойлаштирилган. Депардьенинг адвокатлари уни ҳимоя қилиш учун қаттиқ иш олиб боришмоқда.
CNN нашри 75 ёшли Жерар Депардье ҳозирда сўроқ қилинаётганини билдирган. Актёр билан бир фильмда суратга тушганини даъво қилган икки аёл Жерар Депардьени жинсий зўравонликда айблаб, судга берган.
Аввалроқ ҳам Депардье бир қатор аёллар унга нисбатан шикоят билдириб чиққанидан сўнг, зўрлаш ва жинсий тажовузда айбланиб, расмий терговга тортилган эди. Француз актёри ўзига қўйилган бу айбловларни рад этган.
Бундай воқеа Депардье билан боғлиқ биринчи ҳолат эмас. Аёлларга нисбатан ҳақоратомуз сўзлари учун у аллақачон Франциянинг энг олий мукофоти – “Фахрий легион” орденидан маҳрум қилинган. Бундан аввал испаниялик журналист Рут Баса актёрни 1995 йилда содир бўлган жинсий зўравонликда айблаган эди.
Изоҳ (0)