Bosh prokuratura tomonidan yoqilg‘i-energiya resurslaridan noqonuniy foydalanish bilan bog‘liq holatlarni fosh etishga qaratilgan nazorat tadbirlari davom etmoqda. Bu haqda idora matbuot xizmati xabar berdi.
Xususan, Buxoro shahrida yashovchi fuqaro A.T. yashash uyining qurilishi tugallanmagan binosida umumiy foydalanishdagi elektr tarmog‘iga kripto-aktiv va mayning sohasidagi faoliyatni amalga oshirish uchun mayning qurilmalarini tijorat maqsadlarida noqonuniy ulab, 459,3 million so‘mlik 299,6 ming kVt/soat elektr energiyasini o‘g‘irlagani aniqlangan.
Mazkur holat yuzasidan fuqaro A.T.ga nisbatan Jinoyat kodeksining 169-moddasi (o‘g‘rilik) 2-qismi “d” bandi bilan jinoyat ishi qo‘zg‘atilib, gumonlanuvchi shaxs protsessual tartibda ushlangan.
Avvalroq poytaxtda elektr energiyasiga noqonuniy tarzda ulanib, 1,5 milliard so‘mlik zarar yetkazgan mayning ferma aniqlangani to‘g‘risida xabar berilgandi. Shuningdek, Jizzaxda ikkita mayning ferma davlatga salkam yarim milliard so‘m zarar yetkazgani ma’lum bo‘lgan edi.
Izoh (0)