Kobulda 25-aprel kuni mahalliy, xorijiy savdogarlar va ishlab chiqaruvchilar ishtirokida “Afg‘on-Qozoq” xalqaro ko‘rgazmasi ochildi. Bu haqda Avapress xabar berdi.
Ko‘rgazma “Tolibon” bosh vazirining iqtisodiy o‘rinbosari Abdul G‘ani Barodar, Qozog‘iston bosh vaziri o‘rinbosari va Turkmaniston prezidenti o‘rinbosari ishtirokida ochilgan. “Tolibon” bunday tadbirlar Afg‘oniston va boshqa davlatlar o‘rtasidagi savdo hajmini oshirishini ta’kidlagan.
Ushbu ko‘rgazma Kobul va Ostona o‘rtasidagi iqtisodiy va siyosiy aloqalarni mustahkamlashda qimmatli rol o‘ynaydi, — dedi “Tolibon” harakati savdo va sanoat vaziri Nuruddin Aziziy.
U “Tolibon” sanoat, transport, energetika, qishloq xo‘jaligi va kon sohalarida savdo, tranzit va sarmoyani rivojlantirish uchun to‘g‘ri sharoit yaratganini aytdi.
“Tolibon”ning muvozanatli va iqtisodiy yo‘naltirilgan tashqi siyosati natijasida Afg‘oniston 38 mamlakatda siyosiy vakolatxonaga ega, — dedi “Tolibon” tashqi ishlar vaziri vazifasini bajaruvchi Amir Xon Mutaqqiy.
Afg‘oniston va Qozog‘iston ko‘rgazmasida 80 ta stendda ikki davlatning mahalliy mahsulotlari namoyish etildi.
Izoh (0)