Oilaviy kino marafoni o‘tkazishga nima deysiz? To‘g‘ri tanlangan film bolalarni o‘ziga jalb qiladi va ularning kattalar bilan munosabatiga iliqlik kiritadi. Biz oilaviy tomosha qilish uchun eng yaxshi filmlarni o‘rganib chiqdik va sehrli hikoyalar, hayajonli sarguzashtlarga boy uchta filmni tanlab oldik.
“Suv parisi” (2023)
Ariel ismli yosh va go‘zal suv parisi hikoyasi barchamizga tanish. U qirol Tritonning eng yosh va uddaburon qizlaridan biri bo‘lib, Ariel quruqlikdagi hayot tarzi haqida ko‘proq bilishni orzu qiladi. Sayohatlarining birida u shahzoda Erikni uchratib qoladi va unga ko‘ngil qo‘yadi.
Suv parilariga odamlar bilan muloqot qilish taqiqlanganiga qaramay, Ariel yuragiga quloq solishga qaror qiladi. Shunday qilib, u yovuz dengiz jodugari Ursula bilan shartnoma tuzadi va bu unga yerdagi hayot qandayligini bilish imkonini beradi. Ammo Ariel o‘z hayotini va otasining qirollik tojini xavf ostida qoldiradi.
“Rubbi — xaloskor it” (2022)
Politsiyachi Deniel O’Nil K-9 elita bo‘linmasida xizmat qilishni va oylik maoshi oshishini istar edi. Bir kuni u xizmat uchun sherik tanlashga hayvonlar uyiga boradi va unga Rubbi laqabli it yoqib qoldi.
Kuchuk aqlli bo‘lsa-da, juda betartib, yo‘lida uchragan predmetlarni tishlaydigan, o‘ta sho‘x jonivor edi. Eski egalari uni 7 marta hayvonlar uyiga qaytarib olib kelishgan. Shunga qaramay, Rubbi politsiya xodimi sifatida xizmat qilish uchun zarur bo‘lgan salohiyat va sadoqatga ega edi. Shunday qilib, Deniel itni o‘zi bilan olib ketadi va qayta tarbiyalaydi. Mazkur film real voqealarga asoslangan.
“Alita: jangchi farishta” (2019)
Uchinchi Jahon urushidagi dahshatli voqealardan bir necha o‘n yillar o‘tgach, kiber-shifokor Ido chiqindixonada aqlbovar qilmaydigan artefakt — kiber organizmli ayol qismlarini topib oladi va qayta tiklaydi. Biroq o‘ziga kelgan g‘ayrioddiy katta ko‘zli ayol jang usullaridan boshqa hech narsani eslay olmaydi.
Film yapon rassomi Yukito Kisironing Battle Angel nomli asari kinotalqini bo‘lib, uning prodyuseri “Titanik” filmini tasvirga olgan Jeyms Kemeron hisoblanadi.
Izoh (0)