Sirdaryo viloyati Guliston shahrida oilaviy korxona tabiiy gazdan noqonuniy foydalanib kelayotgani aniqlandi, deb xabar beradi Energetika vazirligi matbuot xizmati.
Qayd etilishicha, Davlat xavfsizlik xizmati, “O‘zenergoinspeksiya” va “Hududgaztaʼminot” AJ xodimlari bilan hamkorlikda o‘tkazilgan nazorat tadbirida Guliston shahrida joylashgan “D.” oilaviy korxonasiga qarashli choyxona rezina shlang bilan hech qanday hujjatlarsiz tarmoqqa ulanib, tabiiy gazdan noqonuniy ravishda foydalanib kelayotgani maʼlum bo‘lgan.
Ushbu holat bo‘yicha 882 million 851 ming so‘m miqdoridagi hisobga olinmagan tabiiy gaz qayta hisob-kitob qilingan.
Qoidabuzar isteʼmolchiga nisbatan belgilangan tartibda chora ko‘rish uchun tegishli hujjatlar rasmiylashtirilib, huquqni muhofaza qiluvchi organlarga taqdim etilgan.
Bundan oldin Bosh prokuratura Toshkent viloyati Bo‘ka tumanidagi metan zapravkada bir oyda 1,8 milliard so‘mlik tabiiy gazdan noqonuniy foydalanilgani haqida xabar berilgandi.
Izoh (0)