Uzbekistan’s club jamoasi o‘zining yana bir yirik loyihasi — Uzbekistan’s club jilokor jurnalining ikkinchi sonini tez orada taqdim qiladi. Zamonaviy va o‘ziga xos uslubga ega ushbu jurnal o‘z an’analariga sodiq qolgan holda yangi trendlarni yaratishni maqsad qilgan.
Jurnalning vazifasi — zamonaviy o‘zbekistonlikning yangi qiyofasiga namuna bo‘layotgan shaxslar va ularning obrazlarini targ‘ib qilish. O‘zbekistonliklarni bitta maydon ostida birlashtirishni maqsad qilgan Uzbekistan’s club jamoasi buni jurnal orqali ham yetkazib berishni maqsad qilgan.
Maqsadi yakdil — O‘zbekistonni dunyoga tanitish, kerak bo‘lsa butun dunyoda uning afsonaviy imijini yaratish. Shu ma’noda jurnal ham “Odamlar, orzular va afsonalar” shiori ostida chop etilgan. Jurnalning bu galgi soni ham o‘zbekistonliklar obrazi orqali eng aktual trendlar haqida so‘zlaydi.
Jurnalning ikkinchi soni O‘zbekistonlik loyihasining AQSH mavsumi doirasida tayyorlangan bo‘lib, uning asosiy fokusi o‘zbekistonlik ayollar, inson kapitali, intellektual jamiyat mavzulariga qaratiladi. Jurnalning bu galgi soni uchun olingan maxsus fotosessiyasida esa o‘rta asrlarda va yaqin o‘tmishdagi Yevropaning eng yuksak san’at asarlari Uzbekistan’s club kreativ talqinida taqdim etiladi.
Jurnalning bu galgi sonida siyosat arboblari, zamonamizning muhim shaxslari, media rezidentlar va Uzbekistan’s club loyihalarini qo‘llab-quvvatlayotgan hamkorlari qiyofalari ham aks ettirilgan.
O‘zbekiston mahallalari uyushmasi raisi Qahramon Quronboyev, AQSHning O‘zbekistondagi elchisi Jonatan Henik, O‘zbekistonning AQSHdagi elchisi Furqat Sidiqov, Bolalar ombudsmani Surayyo Rahmonova, Jurnalistika va ommaviy kommunikatsiyalar universiteti rektori Sherzodjon Qudratxo‘ja shular jumlasidan.
O‘zbek sportining afsonasi Oksana Chusovitina, jamoatchilik faollari media rezidentlar Hikmat Abdurahmonov, Otabek Bakirov, Shahnoza Soatova va AQSHda muvaffaqiyatga erishgan o‘zbekistonlik vatandoshlarimizdan iborat jamoa ushbu jurnalning asosiy qahramonlari sifatida gavdalanishgan.
Ekologiya, inson kapitali, muvaffaqiyatli biznes, madaniyat, kino, musiqa, adabiyot, psixologiya va zamonaviy moda kabi mavzularga bag‘ishlangan chiqishlar jurnalning bugungi kunda trendga aylangan hodisalarni o‘zida jamlashga ko‘maklashgan.
Uzbekistan’s club jurnali yiliga ikki marta o‘zbek va ingliz tillarida chiqadi. Jurnal bepul ravishda Toshkentdagi gavjum jamoat joylarida, qolaversa, xorijiy mamlakatlarda diplomatik vakolatxonalar orqali tarqatiladi.
Izoh (0)