Uzbekistanʼs Club ijodiy jamoasi O‘zbekistonlik tomoshabinlar eʼtiboriga ommabop filmlar va yangi loyihalarning davomini yanada kengroq miqyosda taqdim etishga hozirlik ko‘rmoqda.
Endilikda “O‘zbekistonlik” brendi ostidagi barcha filmlar va seriallar loyihaning media hamkorlari bo‘lgan sakkizta telekanalda namoyish etiladi. Teletomoshabinlar Amerika mavsumini mart oyidan boshlab My5, UzReport TV, “Zo‘r TV”, “Sevimli”, “Milliy TV”, “Renessans TV”, “Yoshlar” va “Mahalla” telekanallarida tomosha qilishlari mumkin bo‘ladi.
Mart oyida tomoshabinlarni, shuningdek, O‘zbekistonlik.Students maxsus loyihasining Amerikada suratga olingan yangi epizodlari premyerasi kutmoqda. Bloger Temur Alixonov Uzbekistanʼs Club jamoasining suratga olish guruhi bilan birgalikda AQSHning eng yaxshi universitetlarida bo‘lib, o‘zbekistonlik iqtidorli talabalar bilan uchrashib, Amerikaning eng nufuzli taʼlim muassasalariga qanday o‘qishga kirish va o‘qish mumkinligi haqida suhbatlashdi.
Iyun oyida O‘zbekiston xalqini yangi qirralarini namoyish etadigan, muvaffaqiyatli yurtoshlarimiz haqidagi qiziqarli voqealar haqida hikoya qiluvchi va muhokamalarga sabab bo‘lishi kutilayotgan Uzbekistanʼs Club jurnalining yangi soni dunyo yuzini ko‘radi. Uning taqdimoti esa bu safar Nyu-Yorkda tashkil etiladigan navbatdagi “O‘zbekistonlik” xalqaro forumi doirasida bo‘lib o‘tadi.
Shuningdek, forum doirasida “O‘zbekistonlik” filmining beshinchi epizodi premyerasi bo‘lib o‘tadi. Ushbu epizodning ikkala qahramoni ham o‘z sohalarida eng yuqori cho‘qqilarni zabt etish uchun katta qiyinchiliklarni boshdan kechirgan hamyurtlarimiz hisoblanadi. Yil oxirida esa tomoshabinlar ijodiy guruhning yaqinda AQSHga qilgan safari chog‘ida to‘plagan materiallari asosidagi maxsus filmning premyerasini tomosha qilishlari mumkin.
Uzbekistanʼs Club o‘z tashabbuslarini faol qo‘llab-quvvatlab kelayotgani uchun Yoshlar ishlari agentligiga, Tashqi ishlar vazirligiga, O‘zbekiston va AQSH elchixonalariga, shuningdek, millatning yangi qiyofasini yaratishdagi ishonchli hamkorlari bo‘lmish — Ucell uyali aloqa operatoriga, Chevrolet Uzbekistan avtomobil brendiga va Uzbekistan Airways milliy aviakompaniyasiga o‘z minnatdorchiligini izhor qiladi.
Amerika mavsumining yangiligi shundan iboratki, taniqli o‘zbekistonlik muhandis Asqarali Karimov boshlovchiligida bo‘lgan O‘zbekistonlik.Podcast deb nomlangan yangi podkast-shouning premyerasi bo‘lib o‘tadi. Shou mehmonlari, o‘z sohasida jahon eʼtirof etgan AQSHda istiqomat qiluvchi taniqli vatandoshlarimiz muhim masalalar: ekologiya, migratsiya, oila va boshqa ko‘plab mavzularni muhokama qilishadi. Shou hamkor telekanallarda, YouTubeʼda, audio ko‘rinishida Spotify, Apple Music, Yandex.Musicʼda va boshqa striming xizmatlarida namoyish etiladi. Podkastlarning bosh homiysi — Uzum milliy va raqamli ekotizimi.
Izoh (0)