Хитой раҳбари Си Цзиньпин Пекинда Германия канцлери Олаф Шольц билан учрашди. Суҳбат чоғида Украинадаги ҳарбий можаро ва уни ҳал қилиш усуллари ҳақида фикр алмашилди.
Иккала томон ҳам ядро қуролидан фойдаланиш ёки ядровий объектларга ҳужум қилишнинг олдини олиш бўйича БМТ Низомининг тамойилларига содиқлигини эълон қилди.
Си Цзиньпин Украинадаги можарони ҳал қилиш учун тўртта тамойилга амал қилиш кераклигини таъкидлади.
Унинг фикрига кўра, ҳозирги вазиятда можаро авж олиши ёки назоратдан чиқиб кетишининг олдини олиш зарур. Шу мақсадда Хитой раҳбари қуйидаги тамойилларга амал қилишни таклиф қилди:
- тинчликка эришиш ва ғаразли манфаатларни кўзламаслик,
- вазиятни юмшатиш ва “оловга мой қуймаслик”,
- тинч музокаралар учун шарт-шароит яратиш ва можароларнинг янада кучайишига йўл қўймаслик;
- можаронинг глобал иқтисодиётга салбий таъсирини минималлаштириш ва глобал саноат таъминот занжирларининг барқарорлигини бузмаслик.
“Хитой инқирозни тинч йўл билан ҳал қилишга қаратилган барча саъй-ҳаракатларни қўллаб-қувватлайди. Шунингдек, Россия ва Украина томонидан тан олинган, барча томонларнинг тенг иштироки ва барча тинч йўлларнинг адолатли муҳокамаси ўтказиладиган халқаро тинчлик конференцияси чақирилишини қўллаб-қувватлайди. Биз барча томонлар, жумладан, Германия билан ҳам ҳамкорликни қўллаб-қувватлашга тайёрмиз”, — деди Си Цзиньпин Олаф Шольц билан учрашувда.
Изоҳ (0)