Ijtimoiy tarmoqlarda kuchli yomg‘ir natijasida Andijondagi Qoradaryoda suv oqimi ko‘paygani haqida turli xabarlar tarqaldi. Mazkur xabarlar yuzasidan Andijon viloyati hokimligi axborot xizmati izoh berdi.
Aytilishicha, tarmoqlardagi videolavhalarda tasvirlangan joy “Kuyganyor” gidrouzeli bo‘lib, suv hajmi soniyasiga 468 metr kubni tashkil etadi.
Ushbu gidrouzel har soniyada 1200 kub metr suvni o‘tkazish quvvatiga ega. Mutaxassislar gidrouzel quvvati 1500 kub metrgacha yetishini bildirishmoqda. Tasvirlardagi oqim esa texnik jihatdan gidrouzelning yarim quvvatidan kamroq hajmga to‘g‘ri kelmoqda, — deyiladi hokimlik axborotida.
Qo‘shimcha qilinishicha, suv oqimi kuzatib borilmoqda va daryoning har bir hududi nazoratga olingan.
Avvalroq Andijon viloyatining tog‘oldi va tog‘li hududlarida 16—17-aprel kunlari kutilayotgan kuchli yomg‘ir yog‘ishi sababli sel-suv toshqinlari yuzaga kelishi xabar qilingan edi.
Izoh (0)