Prezident Sayxunobod tumanidagi “Paxtakon” mahallasida yashovchi mirishkor bog‘bon Tursunboy ota Aripovga Tracker avtomashinasini sovg‘a qildi. Bu haqda O‘zA xabar berdi.
Maʼlum qilinishicha, otaxon mehnat faoliyatini 15 yoshida kolxozda suvchilikdan boshlagan. Keyinroq tumanda tashkil etilgan bo‘rdoqichilik chorva fermasida 40 yil mehnat qilgan. 2011-yilda nafaqaga chiqqach, tomorqasida uzumchilik bilan shug‘ullana boshlagan.
“Prezidentimizning tumanimizga tashrifi mening hayotimda eng baxtli, esda qolarli kun bo‘ldi. Tashrif chog‘ida yurtboshimiz menga Tracker avtomashinasini sovg‘a qildi. Keyin mahalladagi uzum yetishtiruvchilarga murabbiylik qilishimni aytdi. Ishonsangiz, haligacha hayajonim bosilgani yo‘q. Xushxabarning qo‘shqanoti bo‘ladi, deganlaridek, mahalla-ko‘y, tumanimiz, viloyatimiz, qolaversa, vodiydagi qarindoshlar, do‘st-birodarlarning tabriklari og‘ushida yashayapman. Farg‘ona vodiysining Oltiariq tumanidagi “Uzumchi” mahallasi singari endi bizning mahalla aholisi ham uzumchilik bilan shug‘ullanadi. Hamqishloqlarimga bu borada qo‘limdan kelganicha xizmat qilaman”, — degan Tursunboy ota.
Otaning kenja o‘g‘li Azamat anchadan buyon Rossiyada ishlardi. Davlat rahbari tashrifidan xabar topgach, uydagilarga “Qanday zo‘r imkoniyatlar berilyapti. Men endi o‘zimizda ishlayman, deb 3-4 kun oldin uyiga qaytib kelgan.
“Endi kredit olib parrandachilik bilan shug‘ullanish niyatida. Ayni kunlarda otaxonning hovlisi uzumchilikka qiziqqan bog‘bonlar bilan gavjum. Prezidentimizning sovg‘asi minglab odamlarni, ayniqsa, yoshlarni mehnatga ruhlantirmoqda”, — deya qo‘shimcha qilinadi xabarda.
Eslatib o‘tamiz, prezident Shavkat Mirziyoyev 14-mart kuni Sirdaryoning Sayxunobod tumaniga tashrif buyurgan edi. Tashrif chog‘ida bo‘lgan videoselektor yig‘ilishida davlat rahbari aholini daromadli qilish bo‘yicha Sayxunobod tajribasi yo‘lga qo‘yilishini aytgan edi.
Izoh (0)