АҚШ эҳтимолий уруш фонида Яқин Шарққа қўшимча кучлар юбормоқда. Бу ҳақда АҚШ мудофаа вазирлигидаги манбага таяниб, France24 хабар берди.
АҚШ Эрон Исроилга ҳужум қилиши мумкинлигидан хавотири кучайгани сабаб Яқин Шарққа қўшимча кучлар юбораётганини эълон қилди.
Биз минтақавий жиловлаш саъй-ҳаракатларини қўллаб-қувватлаш ва АҚШ кучлари ҳимоясини кучайтириш учун минтақага қўшимча кучларни олиб боряпмиз”, — деди АҚШ Мудофаа вазирлигининг аноним расмийси.
У вазирлик Эроннинг Исроилга қарши кенг кўламли ҳужумидан қўрқишини таъкидлади. 12 апрель куни Исроил мудофаа вазири Йоав Галлант ва АҚШ генерали Эрик Курилла билан Эроннинг Исроилга эҳтимолий ҳужумига тайёргарлик кўриш юзасидан учрашув ўтказди.
Галлант идораси баёнотига кўра, Эроннинг Исроилга қарши ҳужуми минтақавий кескинлашувга олиб келиши мумкин. Бунга эса асло йўл қўйиб бўлмаслиги таъкидланиб, Исроилни қўллаб-қувватлагани учун Галлант АҚШга миннатдорлик билдирган.
Эрон ва Исроил ўртасидаги уруш эҳтимоли
Кенг кўламли уруш эҳтимоли Исроил 1 апрель куни Эроннинг Дамашқдаги консуллигига ҳужум қилганидан сўнг бошланди. Ҳужум оқибатида 11 киши, жумладан, 2016 йилгача Ливан ва Суриядаги “Қудс” элита кучларига раҳбарлик қилган Эрон ҳарбий маслаҳатчиси генерал Муҳаммад Ризо Зоҳидий, унинг ўринбосари генерал Муҳаммад Ҳоди Ҳожи Раҳимий ва яна беш эронлик зобит ҳам ҳалок бўлди. Шунингдек, уч нафар Сурия ва бир нафари Ливан фуқароси вафот этди.
Эроннинг БМТ миссияси зарбани теракт деб баҳолади. Эрон ташқи ишлар вазири Ҳусайн Амир Абдуллоҳиян мазкур ҳужум муносабати билан Америка жавобгарликка тортилиши кераклигини айтди. Шундан кейин АҚШ разведкаси Исроилни Эроннинг жавоб зарбаларидан огоҳлантирди. Бунинг фонида Исроил бир қатор давлатлардаги элчихоналарини вақтинчалик ёпди ва ходимларга ишга келмаслик сўралди.
АҚШ Марказий разведка бошқармаси Исроил расмийларини “яқинда содир бўладиган оммавий ҳужум” ҳақида огоҳлантирган. Америка расмийларининг таъкидлашича, Эрон камида учта ядровий бомба ишлаб чиқариш учун етарли даражада бойитилган уранга эга. Бу ҳақда расмий маълумот йўқ, аммо Эроннинг баллистик ракеталари Исроилга зарба бера олади.
Изоҳ (0)