Fransiya parlamentiga ko‘rib chiqish uchun o‘ta og‘ir ahvoldagi bemorlar o‘limga olib keluvchi dori vositasida o‘z ixtiyori bilan o‘lish huquqini beruvchi qonun loyihasi kelib tushdi, deya Euronews xabar berdi.
Mazkur qonun yakuniy saraton va boshqa davolab bo‘lmaydigan kasalliklarga chalingan bemorlar uchun o‘limga olib keladigan tibbiy muolajadan foydalanish imkonini beradi. Sog‘liqni saqlash vazirining so‘zlariga ko‘ra, bir qator qat’iy mezonlar belgilangan. Agar ular rioya qilsalar, bemor maxsus dori uchun so‘rov yuborishi va muhokamadan keyin uni tasdiqlashi kerak.
Bunday holda, bemor sog‘lom aql va sog‘lom xotiraga ega bo‘lishi kerak, ya’ni Alsgeymer kasalligi kabi og‘ir ruhiy va neyrodegenerativ kasalliklarga chalingan shaxslar dasturdan chetlatiladi.
Birinchi shart – voyaga yetganlik yoshi, ikkinchisi – Fransiyada yashash yoki Fransiya fuqaroligiga ega bo‘lish. Shifokorning tashxisiga bog‘liq bo‘lgan yana uchta shart mavjud. Ya’ni, og‘ir yoki davolab bo‘lmaydigan kasallik, boshqacha aytganda, hayotga xavf tug‘diruvchi va dori vositalari bilan davolab bo‘lmaydigan kasallik haqida gap ketmoqda, — deydi Fransiya sog‘liqni saqlash vaziri Ketrin Votrin.
Avvalroq, Fransiya prezidenti Emmanuel Makron “Hayot tugashi” to‘g‘risidagi qonun loyihasini e’lon qilar ekan, o‘lim bosqichida bo‘lgan bemorlar o‘limga olib keladigan dorini uyda, tibbiyot muassasalarida yoki qariyalar uyida qabul qilishi mumkinligini tushuntirgan edi.
Agar ularning jismoniy holati buni mustaqil ravishda amalga oshirishga imkon bermasa, ular shifokor yoki hamshiradan yordam so‘rashi mumkin.
Izoh (0)