Франция парламентига кўриб чиқиш учун ўта оғир аҳволдаги беморлар ўлимга олиб келувчи дори воситасида ўз ихтиёри билан ўлиш ҳуқуқини берувчи қонун лойиҳаси келиб тушди, дея Euronews хабар берди.
Мазкур қонун якуний саратон ва бошқа даволаб бўлмайдиган касалликларга чалинган беморлар учун ўлимга олиб келадиган тиббий муолажадан фойдаланиш имконини беради. Соғлиқни сақлаш вазирининг сўзларига кўра, бир қатор қатъий мезонлар белгиланган. Агар улар риоя қилсалар, бемор махсус дори учун сўров юбориши ва муҳокамадан кейин уни тасдиқлаши керак.
Бундай ҳолда, бемор соғлом ақл ва соғлом хотирага эга бўлиши керак, яъни Альцгеймер касаллиги каби оғир руҳий ва нейродегенератив касалликларга чалинган шахслар дастурдан четлатилади.
Биринчи шарт – вояга етганлик ёши, иккинчиси – Францияда яшаш ёки Франция фуқаролигига эга бўлиш. Шифокорнинг ташхисига боғлиқ бўлган яна учта шарт мавжуд. Яъни, оғир ёки даволаб бўлмайдиган касаллик, бошқача айтганда, ҳаётга хавф туғдирувчи ва дори воситалари билан даволаб бўлмайдиган касаллик ҳақида гап кетмоқда, — дейди Франция соғлиқни сақлаш вазири Кетрин Вотрин.
Аввалроқ, Франция президенти Эммануэль Макрон “Ҳаёт тугаши” тўғрисидаги қонун лойиҳасини эълон қилар экан, ўлим босқичида бўлган беморлар ўлимга олиб келадиган дорини уйда, тиббиёт муассасаларида ёки қариялар уйида қабул қилиши мумкинлигини тушунтирган эди.
Агар уларнинг жисмоний ҳолати буни мустақил равишда амалга оширишга имкон бермаса, улар шифокор ёки ҳамширадан ёрдам сўраши мумкин.
Изоҳ (0)