Украина томони Европа Иттифоқидан еттита Patriot ҳаво мудофаа тизимини сўради.
Бу ҳақда Европа Иттифоқининг ташқи ишлар ва хавфсизлик сиёсати бўйича вакили Жозеп Боррел бугун, 9 апрель куни Еврокомиссиянинг расмий видеопорталида эфирга узатилган матбуот анжуманида маълум қилган.
“Биз Украинани қўллаб-қувватлашда давом этиш учун маънавий мажбуриятимиз бор. Мен яқинда Дмитрий Кулеба (Украина ташқи ишлар вазири) билан гаплашдим. У мендан еттита Patriot тизимини сўради. Ғарб мамлакатларида 100 га яқин Patriot бор, аммо биз ҳалигача улардан еттитасини Украинага ажрата олганимиз йўқ”, — деди Боррел.
Унинг қайд этишича, Европа давлатлари яқин орада Patriot тизимини Киевга етказиб бериши мумкин. Боррел Европа Иттифоқи ташқи ишлар ва мудофаа вазирларининг навбатдаги йиғилишида Украина Қуролли кучларини ҳаво ҳужумидан мудофаа тизимлари билан таъминлаш масаласини муҳокамага қўйишни режалаштирмоқда.
Изоҳ (0)