Xitoy hukumati AQSH Kongressining Vakillar palatasi spikeri Nensi Pelosining Tayvanga tashrifi tufayli unga va uning eng yaqin qarindoshlariga qarshi sanksiyalar kiritishga qaror qildi, deb yozadi “RBK” XXR TIVga tayanib.
“Noto‘g‘ri va gij-gijlovchi xatti-harakatlarga javoban, Xitoy Pelosi va uning eng yaqin qarindoshlariga qarshi Xitoy xalq respublikasining amaldagi qonunchiligiga muvofiq sanksiyalar kiritishga qaror qildi”, — deyiladi xabarda.
Pelosi Pekinning jiddiy xavotiriga qaramasdan, Tayvanga tashrif buyurib, Xitoyning ichki ishlariga jiddiy aralashdi, uning suvereniteti va hududiy yaxlitligiga putur yetkazdi hamda “yagona Xitoy” tamoyilini poymol qilib, Tayvan bo‘g‘ozida tinchlik va barqarorlikka xavf tug‘dirdi, deyiladi xabarda.
XXR TIV Pelosi va uning qarindoshlariga nisbatan aynan qanday sanksiyalar qo‘llanilishiga aniqlik kiritmadi.
Avvalroq Pelosi uning Tayvanga safari status-kvo (joriy vaziyat)ni o‘zgartirishga urinishlar bilan bog‘liq emasligini aytdi. “Biz eng boshidanoq bu yerdagi ishtirokimiz Tayvan yoki mintaqadagi joriy vaziyatni o‘zgartirish bilan bog‘liq emasligini aytgandik”, — dedi u Yaponiya bosh vaziri Fumio Kisida bilan muzokaralardan keyin bo‘lib o‘tgan matbuot anjumanida.
U Xitoy hukumati AQSH va Tayvan o‘rtasidagi “mustahkam do‘stlik”dan norozi, degan fikrni bildirdi.
Xitoy va Tayvan aloqalari orolga 2-avgust kuni AQSH Vakillar palatasi spikeri Nensi Pelosining tashrifidan keyin keskinlashdi. XXR Tayvanni o‘z hududi deb hisoblaydi va uning Xitoy diplomatik munosabatlar o‘rnatgan mamlakatlar vakillari bilan aloqalariga qarshi chiqadi, bunday muloqotlar uning suverenitetini buzadi, deb hisoblaydi. AQSH, o‘z navbatida, Pelosining safari ularning Tayvanga nisbatan siyosatiga muvofiq kelishini va “ziddiyat uchun hech qanday sabablar yo‘q”ligini qayd etdi.
Avvalroq Xitoy Pelosining Tayvanga tashrifidan keyin Rossiya bilan hamkorlikni kuchaytirishi xabar berilgandi.