Isroilning G‘azoda davom etayotgan hujumining dastlabki to‘rt oyida muhim infratuzilmalarga yetkazilgan zarar taxminan 18,5 milliard dollarga baholanmoqda. Bu haqda Jahon banki va BMT hisobotiga tayanib, Al Jazeera xabar berdi.
Hisobotda yetkazilgan zarar G‘arbiy Sohil va G‘azoning umumiy YIMning 97 foiziga teng ekanligi taxmin qilingan.
Davomli hujumlar G‘azodagi barcha uylarning taxminan 62 foizini vayron qilgan, bu 290 820 uy-joyga teng, milliondan ortiq odam esa uysiz qolgan. Uy-joy umumiy zarar xarajatlarining 72 foizini tashkil qiladi, zararning taxminiy qiymati 13,3 milliard dollar.
Suv, sog‘liqni saqlash va ta’lim kabi davlat xizmatlari infratuzilmasi 19 foizni, savdo va sanoat binolari esa 9 foizni tashkil etadi. Energetika, suv va kommunal tarmoqlarga qariyb 800 million dollar zarar yetkazilgan. Hisobotda sog‘liqni saqlash muassasalarining 84 foizi shikastlangan yoki vayron bo‘lgani aytilgan.
Ta’lim tizimi butkul vayron bo‘lib, G‘azodagi 625 000 nafar bola o‘qishdan mahrum bo‘lgan. Ta’lim infratuzilmasiga yetkazilgan zarar 341 million dollarni tashkil etadi, 56 ta maktab binosi vayron bo‘lgan va 219 tasi qisman shikastlangan.
Birgina G‘azo – 7,29 milliard, Jabalya – 2.01 milliard, Xon Yunis – 1.82 million va Bayt Lahiya – 1.08 milliard AQSH dollari miqdorida zarar ko‘rgan, — deyiladi xabarda.
Hisobot insonparvarlik, oziq-ovqat yordami va oziq-ovqat ishlab chiqarish hajmini oshirish, ko‘chirilgan odamlar uchun boshpana va uy-joylarni ta’minlash va muhim xizmatlarni qayta tiklashga chaqiradi.
Izoh (0)