Исроилнинг Ғазода давом этаётган ҳужумининг дастлабки тўрт ойида муҳим инфратузилмаларга етказилган зарар тахминан 18,5 миллиард долларга баҳоланмоқда. Бу ҳақда Жаҳон банки ва БМТ ҳисоботига таяниб, Al Jazeera хабар берди.
Ҳисоботда етказилган зарар Ғарбий Соҳил ва Ғазонинг умумий ЯИМнинг 97 фоизига тенг эканлиги тахмин қилинган.
Давомли ҳужумлар Ғазодаги барча уйларнинг тахминан 62 фоизини вайрон қилган, бу 290 820 уй-жойга тенг, миллиондан ортиқ одам эса уйсиз қолган. Уй-жой умумий зарар харажатларининг 72 фоизини ташкил қилади, зарарнинг тахминий қиймати 13,3 миллиард доллар.
Сув, соғлиқни сақлаш ва таълим каби давлат хизматлари инфратузилмаси 19 фоизни, савдо ва саноат бинолари эса 9 фоизни ташкил этади. Энергетика, сув ва коммунал тармоқларга қарийб 800 миллион доллар зарар етказилган. Ҳисоботда соғлиқни сақлаш муассасаларининг 84 фоизи шикастланган ёки вайрон бўлгани айтилган.
Таълим тизими буткул вайрон бўлиб, Ғазодаги 625 000 нафар бола ўқишдан маҳрум бўлган. Таълим инфратузилмасига етказилган зарар 341 миллион долларни ташкил этади, 56 та мактаб биноси вайрон бўлган ва 219 таси қисман шикастланган.
Биргина Ғазо – 7,29 миллиард, Жабаля – 2.01 миллиард, Хон Юнис – 1.82 миллион ва Байт Лаҳия – 1.08 миллиард АҚШ доллари миқдорида зарар кўрган, — дейилади хабарда.
Ҳисобот инсонпарварлик, озиқ-овқат ёрдами ва озиқ-овқат ишлаб чиқариш ҳажмини ошириш, кўчирилган одамлар учун бошпана ва уй-жойларни таъминлаш ва муҳим хизматларни қайта тиклашга чақиради.
Изоҳ (0)