Dam olish kunlarini maroqli o‘tkazmoqchi bo‘lganlar uchun qiziqarli seriallar ko‘rish ajoyib imkoniyatdir. Biroq ko‘pchilik seriallar ssenariysi juda ko‘p qismlardan iborat bo‘ladi. Quyida qisqa, qiziqarli va reytinglarda yuqori o‘rinni egallagan mini-seriallar to‘plami bilan tanishamiz.
“Chernobil” (2019)
38 yil avval Rossiyada insoniyat tarixida o‘chmas iz qoldirgan mash’um voqea sodir bo‘lgan. Chernobildagi atom elektr stansiyasining portlashi minglab insonlarni hayotdan olib ketgan va mayib-majruh qilgan.
Mazkur voqealarga asoslangan “Chernobil” seriali portlashdan so‘ng omon qolganlar va o‘sha vaqtda rahbarlik lavozimlarida ishlagan insonlar hikoyalari asosida suratga olingan. Serialda ular voqealar qay tarzda rivojlangani haqida o‘z fikr va xotiralari bilan bo‘lishadi. Serialda AES loyihasi boshdanoq xato bo‘lgani, u yerdagi ishchi xodimlar belgilangan normalar va xavfsizlikka amal qilmagani, rahbariyat esa bunga e’tiborsiz bo‘lgani hamda dahshatli portlash qanday oqibatlarga olib kelgani haqida ham so‘z boradi.
“Qirolichaning yurishi” (2020)
Netflix tomonidan suratga olingan “Qirolichaning yurishi” seriali 7 qismdan iborat bo‘lib, iqtidorli Bet Xarmon ismli qiz haqida hikoya qiladigan psixologik trillerdir.
Serialdagi voqealar 1950-yillarda sodir bo‘ladi. Beta ismli qiz oilasida katta fojia yuz berganidan keyin uni Kentukkidagi bolalar uyiga tashlab ketishadi. Taqdirning barcha qiyinchiliklariga qaramay, qizaloq aqliy qobiliyatini yo‘qotmaydi va keyinchalik shaxmat bo‘yicha noyob iste’dodini namoyon eta boshlaydi. Biroq Beta giyohvand moddalarga ruju qo‘yadi va qaramlikdan qutulish uchun ko‘plab sarguzashtlarni boshidan kechiradi.
“Berlin” (2023)
Mazkur serial “Qog‘oz uy”ning mantiqiy davomi bo‘lib, unda Berlin ismli qahramon haqida hikoya qilinadi. Qahramon egoistik xarakterga ega dunyodagi eng xavfli o‘g‘rilardan biridir. Serialda u butun umri davomida eng yirik o‘g‘rilikni amalga oshirishga — Parijdagi yirik auksion uyidagi 44 million yevrolik qimmatbaho taqinchoqlarni olib chiqib ketishga urinadi. Berlin o‘z rejasini amalga oshirish uchun unga yordam bera oladigan bir nechta mutaxassisni yollaydi. Ularning orasida elektronika bo‘yicha professional mutaxassis Kayla, qulflarni buzuvchi Roy, kollej professori Damian va ustasifarang Bryus bo‘ladi.
Izoh (0)