Yaponiya hukumati janubi-g‘arbiy Okinava orollarida Tayvan bilan bog‘liq harbiy inqiroz yuzaga kelgan taqdirda fuqarolarni himoyalash uchun boshpana qurish bo‘yicha ko‘rsatmalarni e’lon qildi. Bu haqda Nikkei nashri xabar berdi.
Bombapanoh qurish masalasi orollarda bunday obyektlar yo‘qligi hamda odamlarni evakuatsiya qilish juda ko‘p vaqt olishi sababli paydo bo‘lgan. Hisob-kitoblarga ko‘ra, Tayvan yaqinida joylashgan Taketomi va Ishigaki orollaridan 65 ming kishini tijorat reyslarida olib chiqish uchun taxminan 10 kun kerak bo‘ladi.
Nikkei nashriga ko‘ra, Tayvan bilan bog‘liq harbiy inqiroz yuzaga kelgan taqdirda, binolar ostida quriladigan inshootlar odamlarga taxminan ikki hafta chidash imkonini beradi. Bombapanohlarda aholiga elektr energiyasi, bir kishi uchun kuniga 3 litr suv va boshqa zarur materiallar taqdim etiladi.
Xabar qilinishicha, boshpanalar desant hujumidan ham, ballistik raketalar va havo zarbalaridan ham himoya qila oladi. Shu bilan birga, rasmiylar har qanday harbiy hujumdan oldin orollar aholisini evakuatsiya qila olishlarini kutmoqda. Tinchlik davrida binolardan to‘xtash joyi va uchrashuv joylari sifatida foydalanish rejalashtirilgan.
Okinava prefekturasi orollarida metro liniyalari yo‘q va yerosti inshootlari juda kam. 2023-yil 1-aprel holatiga ko‘ra, prefekturada favqulodda yerosti boshpanalari uchun faqat sakkizta joy ajratilgan. Tayvan yaqinida joylashgan Sakishima orollari ma’murlari ham markaziy hukumatdan boshpana borasida yordam berishni so‘ragan.
Yanvar oyida Tayvanda bo‘lib o‘tgan prezidentlik saylovlarida XXR bilan birlashishga qarshi bo‘lgan mahalliy hukmron partiya yetakchisi Lay Tsinde g‘alaba qozongan edi. Keyingi bir necha oy ichida Xitoy yetakchisi Si Szinpin Tayvanni anneksiya qilish haqida bir nechta va’dalar bergan.
Izoh (0)