Toshkent shahri Yangihayot tumanidagi qabristonda mast holatda qabrtoshlarni sindirib tashlagan shaxs javobgarlikka tortildi. Bu haqda “Millar” informatsion dasturida ma’lum qilindi.
Qayd etilishicha, 29 yoshli erkak qabrtoshlarni sindirib, atrofga uloqtirgan. Qabrlarni ustidagi temirlarni titib tashlagan. Uning otasi aynan o‘sha qabristonga dafn etilgani uchun fuqaro bu holatni sodir qilgani aytilmoqda. Hozirda 9 ta qabr fuqaroning uydagilari tomonidan tiklab berilgan.
Ushbu holat yuzasidan sud ishi Jinoyat ishlari bo‘yicha Yangihayot tumani sudida ko‘rib chiqilgan.
Dadam olamdan o‘tib qolganlarida, his-tuyg‘ularim yomon kechdi. Juda siqilib ketganimdan mast holda bu ishlarni qildim. Pushaymonman, hammadan kechirim so‘rayman, — deydi ayblanuvchi.
Sud hukmiga ko‘ra, sudlanuvchi Jinoyat kodeksining 134-moddasida (qabrni tahqirlash) nazarda tutilgan jinoyatni sodir etganlikda aybli deb topilib, unga nisbatan 3 yil muddatga ozodlikni cheklash jazosi tayinlandi.
Izoh (0)