Moskva viloyatida joylashgan Crocus City Hall konsert zalida sodir bo‘lgan teraktdan so‘ng bir qator Yevropa davlatlari terrorizm xavfi darajasini oshirdi, deya Euronews xabar berdi.
25-mart kuni Turkiyada ISHID terrorchilik tashkilotiga aloqadorlikda gumon qilingan 147 kishi qo‘lga olingani haqida xabar berilgan edi. Xabarga ko‘ra, mamlakatda 2023-yilning 1-iyunidan buyon mazkur ayblov bilan 2900 dan ortiq kishi hibsga olingan.
Moskva yaqinida 22-martda sodir bo‘lgan ommaviy qirg‘indan so‘ng Italiya Pasxa arafasida teraktlarga tayyorgarlik darajasini oshirgan. Huquq-tartibot idoralari xodimlari 25-mart kuni Venetsiyada xavfsizlik protokollarini amalga oshirishni boshlagan.
Avvalroq Fransiya hukumati teraktlarga tayyorgarlikni eng yuqori darajaga ko‘targanini aytgan. Parijdagi yozgi Olimpiada o‘yinlari vaqtida ham alohida ehtiyot choralari ko‘rilishi ma’lum qilingan. Bosh vazir Gabriel Attalning aytishicha, huquq-tartibot idoralari xodimlari 2024-yil boshida ISHID tomonidan sodir etilishi mumkin bo‘lgan ikkita teraktning oldini olishga muvaffaq bo‘lgan.
Germaniyada terrorchilik tahdidi darajasi yuqoriligicha qolmoqda. Mamlakat uch oydan kamroq vaqt ichida bo‘lib o‘tadigan futbol bo‘yicha Yevropa chempionati vaqtida sodir bo‘lishi mumkin bo‘lgan hujumlarga tayyorligini aytgan.
Ispaniya Milliy Xavfsizlik kengashi o‘zining so‘nggi aksilterror hisobotida G‘azo va Ukrainadagi urushlar tufayli Yevropa Ittifoqi haqiqiy va bevosita xavfga duch kelishi haqida ogohlantirgan.
Izoh (0)