AQSH sobiq prezidenti Donald Trampning Truth Social nomli ijtimoiy tarmog‘iga egalik qiluvchi Trump Media & Technology kompaniyasining birjadagi qiymati savdoning birinchi kunida bir yarim baravar oshib, sakkiz milliard dollarga yetdi. Bu haqda Reuters xabar berdi.
Trampning kompaniyadagi ulushi (58 foiz) 4,6 milliard dollarga baholanmoqda. NASDAQ birjasidagi savdolarning birinchi kunida kompaniya narxi har bir aksiya uchun 49,95 dollardan 79,38 dollargacha ko‘tarildi, yopilishda esa 57,99 dollarni tashkil etdi. Savdo shunchalik o‘zgaruvchan ediki, u bir necha daqiqaga to‘xtatildi, — deb ta’kidladi Financial Times.
Aniqlanishicha, kelishuvga ko‘ra, Trampga olti oy davomida o‘z ulushini sotishga ruxsat berilmagan. 2021-yil 6-yanvarda Vashingtondagi Kapitoliyga hujumdan so‘ng Tramp ijtimoiy tarmoqlarga kirishi cheklangan va u yirik texnologiya kompaniyalari “zulmi”ga qarshi o‘z platformasini yaratishini e’lon qilgan. Tramp Truth Social’ni Facebook, Twitter va YouTube’ga muqobil deb hisoblagan.
Kompaniyaning fond birjasiga kiritilishi 22-mart kuni AQSH Qimmatli qog‘ozlar va birja komissiyasidan ruxsat olgach, aksiyadorlar tomonidan tasdiqlangan.
Izoh (0)