Xalqaro olimpiya qo‘mitasi (XOQ) Parijda joriy yilning 26-iyulidan 11-avgustiga qadar bo‘lib o‘tadigan Olimpiada o‘yinlarida gender tengligiga erishilishini ta’kidladi. Bu haqda Euronews xabar berdi.
Biroq, ayrim sport turlarida tenglik kuzatilmaydi. Masalan, kurash bilan erkaklar shug‘ullansa, badiiy gimnastikaga esa faqat ayollar qatnashadi. XOQ musobaqaning ayrim turlariga o‘zgartirishlar kiritgan. Ilgari faqat erkaklar ishtirok etgan 50 kilometrlik yurish endi aralash estafeta sifatida o‘tkaziladi.
Kanadaning Brok universiteti vakili Mishel Donnellining so‘zlariga ko‘ra, faqat raqamlar orqali to‘liq tasvirni ko‘rishning imkoni yo‘q.
“Paritet” “tenglik” bilan bir xil emas. Paritet bu raqamli tenglik. Gap raqamlar haqida. Bu sportchilar soni bilan cheklangan. Tenglik esa erkaklar va ayollar nafaqat bir xil miqdordagi imkoniyatlarga, balki ishtirok etishning bir xil shartlariga ega ekanligini bildiradi. Bular poygalar davomiyligi, hajmi va vazni, shuningdek, musobaqalarda jihozlarning joylashishidagi farqlarni o‘z ichiga olishi mumkin. Biz hozircha gender tengligiga erishganimiz yo‘q, — deydi Donnelli.
XOQ asoschisi Baron Per de Kuberten 1896-yilda ayollarga birinchi zamonaviy Olimpiya o‘yinlarida qatnashishni taqiqlagan. 1900-yilda ayollar sportining besh turida atigi 22 nafar ayol qatnashgan bo‘lsa, 975 nafar erkak yengil atletikadan tortib eshkak eshishgacha bo‘lgan sport turlari bo‘yicha qatnashgan.
1952-yilgacha ayollar ishtiroki 10 foizdan oshmagan. Faqat 2014-yilda XOQ o‘z maqsadlari qatoriga to‘liq gender tengligini kiritgan edi.
Izoh (0)