Moskva yaqinidagi Crocus City Hall binosiga qilingan hujumda jabrlanganlar soni 360 nafarga yetdi. Bu haqda “TASS” nashri xabar berdi.
“Chorshanba kuni tonggi holatga ko‘ra, terakt oqibatida 360 kishi, jumladan, 11 bola jarohatlangan”, — deyiladi sog‘liqni saqlash xizmati xabarida.
Shu paytga qadar hujum oqibatida yaralangan 92 kishi kasalxonaga yotqizilgani aytilgan. 63 kishi esa shifoxonadan chiqarilgan. 205 nafar fuqaro ambulator yordam olgan.
Rossiya bosh vaziri o‘rinbosari Tatyana Golikova 26-mart kuni kasalxonalarga jarohatlanganlar kelishi davom etayotganini maʼlum qilgan. Ularga barcha zarur shart-sharoitlar yaratib berilayotgani taʼkidlab o‘tilgan.
Maʼlumot o‘rnida, 22-mart kuni kechki payt Moskva yaqinidagi Crocus City Hall savdo markaziga terrorchilik hujumi sodir etildi. Hozirgacha hujumda kamida 139 kishi halok bo‘lgani aytilmoqda. Hujumda gumon qilingan 11 kishi, jumladan, barcha to‘rt nafar qurolli shaxs qo‘lga olingan. Ular Moskvaning janubi-g‘arbidagi Bryansk viloyatida hibsga olingan. Gumonlanuvchilar yaqin atrofdagi Ukraina chegarasini kesib o‘tib, yashirinishni maqsad qilgan.
Rossiya prezidenti Vladimir Putin hujumdan keyin eʼlon qilgan xalqqa murojaatida Crocus City Hall’ga hujum ortida turganlarning barchasini aniqlash va jazolashga vaʼda bergan edi.
Izoh (0)