Qozog‘iston prezidenti Qosim-Jo‘mart To‘qayev amerikalik senator Stiv Deyns bilan uchrashuvda barcha davlatlar o‘zaro kelishmovchiliklarga qaramay, terrorizmga qarshi kurashda kuchlarni birlashtirishi kerakligini aytdi. Bu haqda “RIA Novosti” xabar berdi.
Uchrashuvda tomonlar xalqaro va mintaqaviy xavfsizlik mavzusiga alohida eʼtibor qaratgan. Shu nuqtayi nazardan, To‘qayev Qozog‘iston dunyoda birinchilardan bo‘lib Moskva viloyatida sodir etilgan vahshiy terrorchilik harakatini keskin qoralagani va Rossiya bilan birdamligini bildirgan.
“Qosim-Jo‘mart To‘qayevning fikricha, terrorizmga qarshi kurashda barcha davlatlar bir-biri bilan munosabatlaridagi qarama-qarshiliklarga qaramay, keng ko‘lamli xalqaro koalitsiya doirasida kuchlarini birlashtirishi kerak. Qozog‘iston ushbu zaruriy ishga o‘z hissasini qo‘shishga tayyor”, — deya xabar bermoqda Qozog‘iston rahbari matbuot xizmati.
Bundan tashqari, To‘qayev uchrashuvda Qozog‘iston sarmoya jalb etish, iqtisodiyotni liberallashtirish va sanoatni rivojlantirishga katta e’tibor qaratayotganini aytdi. Uning so‘zlariga ko‘ra, ikki tomonlama hamkorlikning asosiy yo‘nalishlari energetika, foydali qazilmalarni qidirish va qayta ishlash, infratuzilmani modernizatsiya qilishdir.
“To‘qayev Qozog‘iston—Amerika hamkorligining an’anaviy yuqori dinamikasini qayd etdi. Davlat rahbari ta’kidlaganidek, ikki tomonlama munosabatlarda parlament diplomatiyasi muhim o‘rin tutadi”, — deyiladi xabarda.
Izoh (0)