Қозоғистон президенти Қосим-Жўмарт Тўқаев америкалик сенатор Стив Дейнс билан учрашувда барча давлатлар ўзаро келишмовчиликларга қарамай, терроризмга қарши курашда кучларни бирлаштириши кераклигини айтди. Бу ҳақда “РИА Новости” хабар берди.
Учрашувда томонлар халқаро ва минтақавий хавфсизлик мавзусига алоҳида эътибор қаратган. Шу нуқтайи назардан, Тўқаев Қозоғистон дунёда биринчилардан бўлиб Москва вилоятида содир этилган ваҳший террорчилик ҳаракатини кескин қоралагани ва Россия билан бирдамлигини билдирган.
“Қосим-Жўмарт Тўқаевнинг фикрича, терроризмга қарши курашда барча давлатлар бир-бири билан муносабатларидаги қарама-қаршиликларга қарамай, кенг кўламли халқаро коалиция доирасида кучларини бирлаштириши керак. Қозоғистон ушбу зарурий ишга ўз ҳиссасини қўшишга тайёр”, — дея хабар бермоқда Қозоғистон раҳбари матбуот хизмати.
Бундан ташқари, Тўқаев учрашувда Қозоғистон сармоя жалб этиш, иқтисодиётни либераллаштириш ва саноатни ривожлантиришга катта эътибор қаратаётганини айтди. Унинг сўзларига кўра, икки томонлама ҳамкорликнинг асосий йўналишлари энергетика, фойдали қазилмаларни қидириш ва қайта ишлаш, инфратузилмани модернизация қилишдир.
“Тўқаев Қозоғистон—Америка ҳамкорлигининг анъанавий юқори динамикасини қайд этди. Давлат раҳбари таъкидлаганидек, икки томонлама муносабатларда парламент дипломатияси муҳим ўрин тутади”, — дейилади хабарда.
Изоҳ (0)